Diamars siman pasa den un reunion publico den parlamento di Aruba minister di Infrastructura y Medio Ambiente tabata presente pa asina por a trata sorpresanan cu e gobierno nobo a haya respecto e green corridor (GC) unda finalmente coalicion unanimamente a otorga un machtiging na minister Otmar Oduber(POR) pa atende un reunion cu caracter di urgencia yama pa e lendersnan mediante nan agent AIB hunto cu CIC NV. CIC NV ta caribbean infrastructure company cual ta e compania cu tin un Credit Agreement cu e lendersnan, entre otro Deutsche Bank y lendersnan ta preocupa pa e pagonan cu segun contracto mester cuminsa drenta. Odinsa representa pa su managing director Mauricio Osso ta esun encarga cu e construccion.
Control di e proyecto GC
Dia 5 di januari 2018 PWC riba peticion di gobierno a produci un rapport cronologico di e situacion y 15 di januari 2018 tin un version mas al dia di dicho rapport. Kico ta e situacion real? Meymey di aña 2015 land Aruba a firma un PPP/ DBFM contracto cu CIC. DBFM ta para pa design build finance and maintain. CIC ta cera un Credit Agreement cu e banconan y lo haya e prestamo bao condicionnan estricto di un PPP/DBFM contract. Lendersnan ta contracta un compania internacional experto pa haci control di e proyecto, entre otro pa check si tur material y trabao ta cumpli cu e contracto. E compania aki yama Mott Mc Donald. Land Aruba y CIC tambe a bay di acuerdo pa e mesun compania aki haci e control pa nan parti tambe. Parlamentario Endy Croes ta remarca cu esaki caba ta e prome eror paso aki ta trata di conflicto di interes. Mesun compania ta controla interes pa tur tres partido envolvi. Ta manera pushi ta cuida pisca.
Pais Aruba perhudica
Ademas di parti land Aruba Benny y DOW e tempo aya a lanta un PPP unit cu ta consisti di personanan cu ta domina e materia PPP kende nan tambe mester haci control di parti gobierno su interes. E rapport ta mustra cu lamentablemente pa 1 aña y mey esaki no a tuma luga cual ya caba ta perhudica land Aruba. Na october 2016,momento cu e proyecto tin mas di un aña andando, DOW/ land Aruba a contract PWC pa brinda nan experticio y apoyo den e proyecto. December 2016 PWC a constata cu e proyecto no ta wordo dirigi conforme PPP/DBFM contracto y cu DOW no tin e conocemento como experto riba tipo di contractonan asina.
-300x191.jpg)
Rapport di PWC
Den un segundo kwartaal di rapport di PWC na maart 2017 cual rapport a keda scondi den lachi pa pueblo y oposicion e tempo aya,tanto door di DOW como Benny, momento cu Benny y Mike ta den pleno campaña y hunto nan no tabata give a dame e rapport aki ta splica cu no por confia riba e calidad di trabao di dicho contratista y e risico ta hopi halto cu e trabao di CIC no ta cumpli cu e demanda di e contracto. Aki nos mester para keto un rato. Unda responsabilidad di Benny tabata ta pa trek e cos aki recht? Unda DOW a keda ? Dicon no a informa parlamento? Aki un hende mester bay carga su responsabilidad y kico cu bin afo no ta pueblo so lo mester carg’e. E rapport aki ta hasta splica cu CIC no ta den control di e proyecto mas na e momento ey. Anto tur hende a keda bo cacallao! Increibel! Ta constata 55 punto di penalidad mas 500 punto di atencion pa cu e proyecto. Tur esaki a conduci cu e proyecto cu segun contracto mester a wordo entrega 14 di augustus 2017 no a wordo entrega di acuerdo cu contracto. CIC a manda un carta pa DOW ofreciendo un fecha nobo,esta 15 di november 2017 pa entrega e proyecto.
Aceptacion di e proyecto GC
Mientras tanto memey di tur e problemanan serio aki, Mike Eman y Benny tabata preparando fiesta di cumpleaños di Mike dia1 di september 2017 pa celebra riba e famoso brug cu ta ni entrega oficialmente te cu awe. Alabes e fiesta riba e brug a costa pueblo Afl.142 mil florin. Momento cu CIC entrega e proyecto, land Aruba mester bay di acuerdo cu esaki y percura pa esaki ta conforme contracto y momento cu land Aruba acepta tur cos, e momento ey CIC lo ricibi un asina yama certificado di The Summit,es decir cu Aruba e ora ey lo cuminsa paga pa 18 aña largo un suma di rond di 17 miyon pa aña. Sinembargo mirando cu CIC no por a cumpli na november 2017 tampoco y tanten cu Land Aruba no tuma e proyecto y bay di acuerdo cu e proyecto,pagonan lo no cuminsa core y alabes Odinsa (CIC) a bisa lendersnan cu nan no por haci pago tanten cu Aruba no acepta e proyecto. Esaki ta e motibo real cu lendersnan mediante nan compania cu ta coordina tur e prestamonan cual ta AIB cu ta wordo yama the agent a pidi un reunion di urgencia cu tur partner envolvi den e proyecto. Dicho reunion a tuma luga 18 di januari ultimo na Aruba unda Minister Oduber cu su expertonan den e materia mester tabata presente. Parlamento di Aruba lo sigui e desaroyo aki di cerca. Hopi remarcabel pa mira e manera cu Benny y AVP ta deal cu e proyecto aki. Di berdad Benny su echonan di sinberguensa ta manera e mes a expresa den parlamento: I dont give a damn cu placa di pueblo!!!
