Fondo Monetario Internacional (IMF) a declara ayera cu e hiperinflacion na Venezuela por ta mas fuerte e aña aki, compara cu loke a anticipa te awor.  IMF ta mira un continuacion di e panorama desolador pa Venezuela, cu un recesion di 15% di su PIB (GDP) na 2018, cu lo hiba e pais na un contraccion di su economia desde 2013 di casi 50%.  Ta proyecta un inflacion cu a supera 2.400% na 2017 y pa 2018 esaki por yega na alrededor di 13.000%.

E documento di IMF, skirbi pa e director di Departamento di Hemisferio Occidental, Alejandro Werner, ta bisa cu na Latinoamerica en general  inversion lo hunga un papel mas importante den crecimento y cu e retroceso di inflacion ta laga margen pa un politica monetario mas comodo.

IMF a duna mas detaye di su perspectivanan actualisa pa Latinoamerica, den cual a destaca miho resultado economico pa Mexico y Brasil, a base di e expansion economico na Merca y e subida den prijs di materia prima.

Di Mexico, IMF a bisa cu ta anticipa cu  inflacion lo disminui drasticamente na 2018 segun cu e efecto di e aumento di prijs di combustible di aña pasa bira menos. IMF no a duna proyeccion nobo di e desaroyo di prijs na Mexico.

Como factor di riesgo pa Mexico, IMF ta mira e incertidumbre alrededor di e negociacionnan encuanto e Tratado di Liber Comercio di Norteamerica y e eleccion presidencial di juli proximo, loke por obstaculisa crecimento a corto plazo.

Di manera similar, pa loke ta Brasil, IMF ta mantene e opinion cu e desenlace incierto di eleccion general di 2018 lo por obstaculisa crecimento economico. Esaki tabata un recordatorio di e comentario di e organismo na october pasa,  unda a alerta pa un posible cambio den e region na fabor di populismo.

Di Argentina IMF a bisa cu ta anticipa cu crecimento lo disminui un poco te 2,5% pa 2018, debi na e contencion fiscal y monetario, cu un inflacion cu lo sigui retrocede a base di un moderacion di e aumento di salario.

Tambe IMF a observa e beneficionan di e aumento di prijs di koper y petroleo pa economia di respectivamente Chile y Colombia. Di Peru e documento  a señala cu e impulso fiscal programa pa 2018 lo ta critico pa e reactivacion di crecimento.