Den un encuentro cu exiliadonan Venezolano na Florida, unda tabata presente e secretario general di Organisacion di Estadonan Americano (OEA), Luis Almagro, a discuti e posibilidad pa institui campamento di refugiado oficial na Colombia y Brasil, cerca di nan frontera cu Venezuela.
E propuesta tin como meta pa duna miho atencion na e cien mil di refugiado cu tin actualmente, y cu ademas e realidad cu cada dia tin dies mil mas ta crusando frontera en busca di ayudo. Tambe ta considera cu di e manera aki lo ta mas factible pidi y ricibi ayudo internacional, si tin autoridad cu ta encarga cu e campamentonan.
E evento “Formalisacion di e Campamentonan Humanitario”, tabata organisa pa e Coalicion Internacional pa Venezuela “Unidos en una sola voz” y pa sociedad civil.
Luis Alamagro a uni su mes na e idea di formalisa e campamentonan di refugiado y e yamada na e gobiernonan di Colombia y Brasil pa tuma e pasonan pa realisa esaki. Apoya e campamentonan ey, el a bisa, ta un “prome paso importantisimo cu comunidad internacional mester asumi”, mientras tambe el a haci yamada pa un dialogo politico, cu no ta concentra solamente riba envio di ayudo humanitario pa Venezuela, loke a keda nenga permanente, sino tambe riba solucion pa Venezolano cu ta sufri den exterior.”
E activistanan Venezolano lo presenta un peticion na presidente di Colombia y Brasil pa decreta e formalisacion di campamento den e alberguenan “como un manera pa fomenta e solidaridad internacional y permiti un mayor control na frontera, na beneficio di nos paisnan y e victimanan.”
E ciudadnan na frontera ta na bordo di collapse p a e avalancha humano cu ta crusa pa teritorio Colombiano, y den menor grado, esun Brasileño. Na banda Colombiano ya ta calcula e cantidad di refugiado Venezolano na mas di mey miyon, cu dies mil drentando diariamente.
