Ex-presidente Dilma Rousseff a declara cu e ta considera cu Brasil lo ta ingobernabel si husticia declara candidatura di Lula pa eleccion na october invalido, algun dia prome cu un corte lo defini si e condena di casi 10 aña di prizon pa e ex mandatario, di e partido di izquierda Partido di Trahado (PT) ta keda ratifica.

E veredicto di segundo instancia den e caso den cual Luiz Inácio Lula da Silva (2003-2010) a ser acusa di ricibi un apartamento di e empresa constructor OAS, a cambio di obranan pa Petrobras,  por cambia escenario politico di e economia mas grandi di Latino America completamente.

“Cualkier gobierno cu sinta, ganando eleccion di 2018, sin cu tabatin un proceso electoral transparente y corecto, sin maniobra pa elimina candidatonan manera Lula, no lo logra goberna e pais aki”, Rousseff a bisa AFP den un entrevista telefonico desde Porto Alegre.

Lula ta encabesa e sondeonan di intencion di voto y un confirmacion di e sentencia por pone fin na su candidatura y hasta hib’e te prizon.

Pa Rousseff, di 70 aña, cu a perde su presidencia na 2016 na man di Congreso pa manipula e cuentanan publico, Lula ta e figura cu por calma e pais. “Mi no ta kere cu insisti den uzo politico di e sistema hudicial ta stabilisa y laga e pais crece. Lula por yuda nos bira e pagina aki, yuda den un periodo di transicion pa yega na un reconstruccion. Nos mester purba cura e heridanan y recompone e pais,” el a declara.

Rousseff ta biba den e bario Tristeza di Porto Alegre, cerca di su yiu y su nietonan. Na e ciudad aki e huicio contra Lula lo tuma luga y partido PT ta spera di inunda e ciudad cu su simpatisantenan.

Cu miedo pa desorden, autoridadnan a pidi ayudo di ehercito, mientras cu senadora Gleisi Hoffmann, presidente di PT, a afirma cu si nan kier aresta Lula nan lo mester “mata hende”.

Rousseff, sin embargo, no ta kere den e posibilidad ey. “Loke tin ta indignacion y e indignacion ta un sentimento pacifico, democratico (…) E indignacion ey ta un expresion di cu hende ta consciente di e inhusticia y persecucion politico”, el a bisa interpretando e polemico expresion di Hoffmann.