‘Modelo actual medico no adecua pa suicidio y depresion’
Psicologo Dimitri Halley ta un experto den e mente/salud mental cu ta trata cu hopi pashent aki na Aruba. E ta conta nos cu e pensamentonan di intento di suicidio ta keda aumenta anto e modelo actual medico/cientifico no tin manera debido ainda pa trata cu esaki.
“E pensamentonan di suicidio ta aumentando drasticamente como tambe e tendencia pa tapa cos manera abuso sexual y otro traumanan”, e psicologo ta conta. E ta bisa cu e no ta algo pasando na Aruba so pero sigur mundialmente.
Na momentonan aki segun e World Health Organization (WHO), depresion y pensamentonan di suicidio ta e causa mas grandi na mundo bou hende incapacita; esta hendenan cu ta stop di funciona den nos sociedad. Mescos cu abuso sexual, e psicologo ta bisa cu tin hopi cos cu mester facilita pa e persona por sali. Sr. Halley: “Pues no ta tur hende lo yega bisa bo cu nan tin pensamentonan pa suicidio, tin hopi hende ta sconde. Pero e problema ta grandisimo y ta birando mas y mas grandi actualmente. Anto p’esey na Hulanda bo ta wak cosnan manera e clinicanan cu ta causando hopi shock den pueblo unda bo por pone hende drumi. Na Hulanda tambe tin discusion riba e cos aki pasobra tin otro specialistanan mental cu no ta di acuerdo. E ta e tendencia unda cu nan kier habri caminda pa mustra pueblo cu esaki ta un opcion segun sr. Halley,cual ta hopi peligroso. “Pasobra e ta un tendencia di normalisa cosnan cu den realidad ta fout.”
No por drecha depresion cu remedi
E psicologo a comparti su pensamento/opinion riba pakico esaki ta creciendo y kico ta e origen realmente di dje. Den publicacionnan anterior Bon Dia a combersa cu sr. Halley riba varios tema cu ta yega cerca di esaki pero e biaha aki nos a bay un poco mas profundo den dje. “E modelo actual medico/cientifico no por compronde e cos aki bon.” E psicologo a remarca cu algun dia pasa un colega psikiatra a bis’e cu nan ta consciente cu psikiatria a gara e caminda robes, ‘pasobra el a bay den e sentido cientifico y big pharma (companianan di remedi, red.)’ Cual segun sr. Halley, ta proba cu e sistema aki a faya pasobra bo ta haya remedi demasiado. Unda na final e persona ta bira manera un ‘zombie pero e ta un fuente di ingreso increibel pa big pharma’.
Na Hulanda e asociacion di psikiatra recientemente a bati alarma unda cu e psikiatranan mes cu tin cu duna remedi na pashent, a bati alarma cu nan no por mas.
Algun siman atras a sali un publicacion den media Hulandes NOS, unda cu di parti di e asociacion di psikiatranan a bati alarma cu nan no por funciona mas bao e structura actual. Tabata tin mas cu 600 psikiatra cu a sostene esaki unda por a mira hasta un di e psikiatranan ta yora dilanti camara durante un rueda di prensa pa motibo cu su consenshi ta matando e, segun sr. Halley. “E punto ta esaki; depresion ta hopi mas profundo cu locual remedi por drecha. Akinan ta unda nos a faya.”
Fenomeno global
E psicologo ta bisa cu p’esey awo por cuminsa mira un fenomeno global unda mas y mas hende ta drentando den depresion, cu ta caba cu pensamentonan suicidio y yen di cos. Manera tambe hendenan cu kier kita nan mesun bida y kita esun di bo tambe. Tin dos forma di depresion segun sr. Halley; uno riba nivel di tur dia cual ta e ups & downs di tur dia. “Pero si e down aki wordo soluciona cu remedi so y reprimi, bo ta keda corte afo te ora e bira un monster. Pasobra bao di e nivel di depresion ey tin trauma. Cu si e cosnan no wordo saca afo y procesa realmente, bo ta haya bomnan canando rond den sociedad cu lo explota riba bo.”
Sr. Halley ta bisa cu esun di mas importante pa tene na cuenta cu ne ta e nivel di depresion unda cu bo ta yega na momento cu e persona no tin gana di biba mas, pasobra nan ta sinti cu nan no tin un proposito den bida.
Perde bo ‘spirito’
“Den Natuurkunde nos a descubri cu den e atom tin un quantum core cu nos por yama energia, cual ta bay mas leu cu 3D. Nos a haya e mescos den psicologia; den e fuente di e mente tin un spiritual core (centro spiritual, red)’, sr. Halley ta splica. “Na Europa esaki no ta wordo reconoci mas den hende y ta papia mas cu un hende ta un robot organico basicamente. E ta bay man den man cu un cultura cu ta bay den dos ramo; di religion of ateismo/pensamento cientifico. Tur dos a secuestra e spiritual core aki den hende unda cu ciencia por ehempel ta bisa cu e no ta existi, y misa e ta apodera di dje den forma di uza hende cu solamente via nan por yega na dje y yam’e Dios etc.”
E psicologo ta sigui: “E punto ta cu ora mi ta haya un cliente cu ta den depresion profundo, mi ta bay riba e parti aki. Pa motibo cu na Aruba ainda nos tin un conexion profundo cu e parti indigeno, e hendenan ta bisa mi letterlijk cu nan ta perde nan mes of spirito. Bo mente ta bay off ora bo perde contacto/acceso cu bo spiritual core cu ta un parti di bo cu ta bay mas leu cu tempo y espacio.” E psicologo ta splica cu si bo no tin un conexion cu esaki bo ta bira depresivo pensando cu bo ta basicamente den un caha y aki poco tempo bo ta bay muri sin tin nada despues di esey.
Epidemia di depresion
E psicologo ta conclui cu ta pa e motibo aki tin un epidemia di depresion pasobra hendenan no ta sinti mas cu nan tin un proposito of conexion cu un parti di nan mes cu ta mas leu di e mundo aki. “Anto ta akinan ta unda nos por yuda e paisnan Europeo. Pasobra akinan ainda nos tin conexion cu e cos aki”, e psicologo ta bisa, agregando cu su colega psikiatra a confesa na dje cu e tambe a cuminsa reconoce cu e parti spiritual aki ta importante. “For di akinan ta bin adiccionnan unda bo kier yena un bashi cu bo no por yena cu un adiccion. E punto ta cu e manera con nos ta acerca depresion aworaki ta fout.” Den siguiente publicacionnan nos lo sigui expande riba e tema cu sr. Halley y tambe otro expertonan riba nos isla.
