Director di Departamento d Obranan Publico (DOW) a comenta riba e reunion den parlamento unda a sali afo cu tin problema grandi cu e proyecto di Green Corridor. El a expresa cu e ta ‘contento cu e bendicion di parlamento pa pa por yega na un time table pa soluciona e problema’.
“Un trabou infrastructural mas grandi cu Aruba a yega di conoce den 50 aña. Ora cu mester di e conocemento riba e verificacion matrices, pa sa con ta bay toets si a cumpli cu tur rekisitonan si of no y demostra esaki na DOW. Momento cu DOW a wak esey a dicidi di haci un inventarisacion y a sali como un 500 punto cu mester drecha”, asina e director Marlon Croes ta bisa den un relato cu nos a ricibi.
Unda e ta admiti tambe cu e ta ‘responsabel pa e contratista resolve e problema aki’. “Den e caso aki DOW a haya e bendicion di parlamento diamars y via minister di Infrastructura cu por drenta den combersacion pa wak con yega na un time table ki dia ta bay soluciona e problemanan aki.”
E ta bisa tambe cu: “Den tur proyecto cu ta traha semper tin partidonan critico cu por topa cu ne. Mirando e magnitud aki e critica ta hopi mas grandi compra cu un proyecto cu ta traha tradicional. Mester corda cu Green Corridor ta un proyecto cu a bay via un mitologia nobo y den cas mes no tabatin e experticio riba maneho di contracto di duracion largo y p’esey a pidi sosten.”
Menos supervision di nan ora ta trata PPP
Nan di DOW tambe ta haci inventarisacion di e trabounan cu a tuma luga. “Den un PPP, DOW mester haci hopi menos trabou di supervision cu un trabou tradicional. Un trabou tradicional ta 100% riba dje tur dia pa garantisa cu e pagonan ta tuma luga segun e schedule.” Director di DOW ta splica tambe cu den un PPP, esaki ta ful otro pasobra ningun pago no ta tuma luga te ora e proyecto ta cla cu e calidad specifica. Den e caso aki, pa yega na e pago tin hopi trabou cu mester ser haci, y ta trabou grandi.
