Meta honorabel, instrumento robes?
Finalmente, ayera a yega un fin na un aventura, mas bien un hazaña epico, cu a cuminsa na mita di aña pasa. Un ex polis Venezolano, bon entrena y cu hopi experiencia den cuerpo policial, ta yega na e conclusion cu como polis el a bira complice di e masacre cu e comunistanan, hunto cu e cuerponan di siguridad ta organisando den e pais. E ta dicidi di bay tuma accion, y ta hacie na un forma moderno: e ta uza medionan social pa anuncia su lucha personal, apoya pa un man yen di persona, contra loke e ta yama e narcodictadura cu tin su patria secuestra desde varios aña caba.
Na juli aña pasa a tuma luga su hazaña mas grandi, tempo el a horta un helicopter di forsa arma y a ataca entre otro e Tribunal Supremo di Husticia. Despues el a disparce, y te cu ayera e cuerponan di siguridad no por a hay’e. E combate desigual a termina cu su morto y di varios di su compañeronan, cu a scoge e riesgonan grandi cu nan tabata core, pa haci un declaracion pero no uno politico, pero uno como ser humano cu kier mira nan pais liber atrobe. P’esey a cuminsa cu un lucha arma, pero na nivel practicamente individual y no na nivel di crea un ehercito di liberacion cu e intencion y e pretension di caba cu e regimen bon estableci, den un matrimonio diabolico entre comunistanan cu a nace un siglo mucho laat, y militarnan corupto.
Kico nos por siña di e evento tristo aki? Pa cuminsa, cu den hopi caso curashi no ta suficiente. Tin hende cu lo recorda Perez como un heroe cu a lanta para, a pesar di e lucha desigual cu a conduci na su morto. Pa otronan el a keda un terorista cu tambe gusta arma. Ademas, ta rekeri hopi mas pa por tumba un regimen malvado manera esaki. Cu esey nos ta bisa cu pueblo di Venezuela mester cuminsa cu un lucha arma amplio pa deroca e dictadura aki? Esey hamas. En principio ta algo honorabel cu pueblo Venezolano no a scoge pa cuminsa un lucha arma, y a mantene e lucha na nivel civico, pero e tin como consecuencia si cu, si mester yega na un fin di e pasadia historico aki, e solucion lo mester bin di un otro banda.
E otro opcion ta tumando luga tambe actualmente, pero pa hopi hende na Venezuela y na otro pais, e proceso ta bay demasiado poco poco. E proceso ta e deterioro economico, cu ironicamente no tin un boycott internacional como e factor mas importante, sino e actuacion di e regimen mes, cu ta kere ainda den e fabula di e economia centralisa, cu e ‘honroso partido revolucionario’ como e vanguardia cu ta hiba su pueblo na gloria y prosperidad eterno. Lastima cu den e siglo aki ainda tin hende ta kere den e nonsense aki, unda nan mes por a mira con Union Sovietico a kibra y China, cu e partido comunista na mando, a bira mes capitalista cu Merca.
Hasta e ultimo bastionnan di socialismo for diehards manera Corea del Norte y Cuba no lo sobrevivi pa hopi tempo mas. Ta hustamente e surgimento di e regimen Chavista a alarga e existencia di e regimen comunista na Cuba. Unabes cu esey no t’ey mas, Cuba lo ta obliga pa habri porta pa iniciativa priva, loke a proposito ya ta tumando luga. Ta hustamente e accionnan di Trump a para e desaroyonan economico positivo na Cuba, cu a inicia bao di presidente Obama. E porta sin embargo a keda habri pa e paisnan Europeo y paisnan riba nos continente, manera Canada.
Pregunta grandi ta con cos lo sigui, specialmente e aña aki, cu e deterioro economico cu na dado momento ta haci e pais ingobernabel, pero di otro banda ta alarga e sufrimento di e ciudadano. Mirando esaki, recientemente e economista mas prestigioso di Venezuela, Ricardo Hausmann a trece e opcion dilanti di un intervencion militar. E no a bisa esaki pasobra e ta na fabor, mas bien e kier a critica oposicion Venezolano cu ta kere cu e dictadura mas malo di historia di America Latino ta bay entrega poder, sea na mesa di negociacion, sea den eleccion liber.
Si intervencion militar externo no ta posibel ni deseabel, anto kico si por haci pa logra cu e sufrimento cerca nos bisiña ta mas cortico posibel? Por lo menos cuminsa actua, pa duna e regimen aki bon di comprende cu esaki no ta e bisiña cu nos ta desea di tin. Nos mester ta consecuente den loke nos ta haci y loke nos ta bisa. Nos mester sa ta ken ta nos aliadonan riba e continente y ken no. Pakico un pais manera Colombia ta tuma un postura fuerte contra e regimen di Nicolas Maduro, y alabes ta atende casi mita miyon refugiado den nan pais? Nos a yega di pronuncia nos mes contra e tragedia cu ta tuma luga na apenas 15 miya di nos isla? Of nos ta preocupa solamente pa e awacatinan cu no ta yega? Sikiera e honor ey nos por duna e Oscar Perez nan cu sin duda t’ey ainda.
