Tata Sr. Danies no a haya contesta, ningun politico a dirigi palabra na dje Lisette Gomes: “si no haya contesta den 30 dia ta acerca Unicef”

Ayera riba celebracion di Dia di Rey tabatin dos manifestacion cu a tuma luga dilanti di Parlamento y Bestuurskantoor contra di abuso sexual di mucha. Sr. Reginald Danies a ba pa busca contesta di su manifestacion entrega dos siman pasa, sinembargo ningun hende no a dirigi palabra na dje. Lisette Gomes di Fundacion Lisette Gomes na su turno a presenta cu un manifiesto y a duna e mandatarionan 30 dia pa ricibi contesta.

Desde 1or di merdia Sr. Danies tabata para dilanti di Parlamento wardando algun parlamentario of minister presenta. Pa mas o menos 2or y 40 Fundacion Lisette Gomes a cuminsa cana for di Juliana School bin direccion Parlamento pa asina topa cu Chris Dammers pa haci entrega di manifestacion. Despues di esaki a pasa pa entrega ministernan e manifestacion dilanti di bestuurskantoor. Emocionnan sigur tabata hopi halto entre esunnan presente y por a scucha constantemente palabranan ta wordo ‘tira’ pa e parlamentario y ministernan. Palabranan manera “boso ta gaña”, “payaso”, “bo a lubida mi” y “con a para cu mi caso”.

Comentario Lisette

Despues di e manifestacion a puntra Sra. Lisette con e ta haya cu e manifestacion a bay den su totalidad. El a bisa cu esaki a bay hopi bon mirando cu ta un dia liber cual ta hacie un tiki mas dificil pa haya e ministernan y parlamentarionan. A pesar di esaki por a mira cu nan a presenta pues nan a haya e yamado. Tur tres minister tabata presente, minister encarga cu husticia Arthur Dower, minister encarga cu Asuntonan Social Paul Croes y minister encarga cu salud Alex Schwengle. Tambe Chris Dammers encarga cu Parlamento, cu a acepta e manifestacion unda cu tur a bisa cu lo bin cu cambionan pronto. Den e manifestacion Sra. Gomes a indica di ta bin busca un contesta bek den 30 dia di e mandatarionan, pues a puntr’e kico ta e siguiente paso cu e lo tuma den caso cu e no tende nada bek for di nan den 30 dia. El a bisa: “Den 30 dia nos lo bin bek den un reunion pa wak kico a pasa si nos no tende nada. Si esaki ta e caso nos lo tuma pasonan internacional cerca Unicef pa asina yega na Nacionnan Uni.” E ideanan a bin di un grupo di bastante persona cu ta yuda e fundacion Lisette Gomes, unda cu asina a haci investigacionnan, a haya ayudo di ex fiscal, ayudo di abogadonan entre otro, pues patras di e grupo cu ta mira tin mas hende yudando y consehando. El a enfatisa cu tin e contacto nan caba na ken pa nos yega cerca di Unicef, pero no a haci niun contacto ainda, y lo duna Parlamento y Gobierno e 30 dia. Sra. Gomes a bisa.

Parlamentario Bikker manifestando

Den e grupo di manifestantenan cu a compaña Fundashon Lisette Gomes, tabatin Parlamentario Andin Bikker tambe canando sosteniendo e causa. A tene un entrevista cortico cun’e pa haya kico at su pensamento tras di e manifestacion. El a bisa: “Na 2010 caba mi tabata parti di un comision cu a wordo instala di pa atende cu e tematica akinan. Den mi concepto mi ta haya cu di parti  gobierno no tin suficiente atencion y recursonan no ta wordo poni pa atende cu esaki. E falta tambe pa gobierno aloca fondonan pa introduci un kinderombudsman pues un defensor di mucha cu ta un concepto di ley den Parlamento pero gobierno no ta atendiendo cu esaki debidamente y ta tardando e proceso. Tambe tin cierto cambionan di ley cu mi ta pensa cu lo por wordo poni of haci cu den mi concepto gobierno no ta trahando riba dje. P’esey nos partido a bin aki pa duna sosten y pidi mas atencion pa e problema aki cual ta uno hopi delicado.”

A menciona na Sr. Bikker e lista cu varios aña pasa Sra. Gomes a hiba parlamento pa firma pa wak si por subi castigo pa esun culpabel den caso di abuso un mucha. Sr. Bikker ta un di e 5 nan cu a firma pro aumento di castigo e tempo ey y minister Paul Croes ta un di esunnan cu a vota contra. El a bisa cu e tempo ey un mocion a wordo presenta den parlamento pa subi e castigo unda cu oposicion a sostene e mocion ey. E fraccion cu ta sostene gobierno, pa X motibo no a sostene, pero en todo caso ta cu varios aña a pasa y nada no a tuma luga den ambito di cambionan den ley of maneho. Anto p’esey mi ta kere ta completamente hustifica cu e ciudadano aki y hopi di nan ta bin awe pa haci uzo di nan derecho pa entrega un manifiesto pa pidi atencion na puntonan clave cu ta den man di gobierno y parlamento. Pa mehora e condicionnan pa preveni e casonan y pa hisa castigo y castiga e mal hechornan cu ta haci nan mes culpabel na e actonan aki, Sr. Bikker a termina bisando.

Subi nos pagina di Facebook Bon Dia 24 Aruba pa mira video di mas potret di e manifestacion aki.