Nos a caba di haya e bon noticia cu e evento pa ciudadano cu ta busca trabao di siman pasa a yega na sigur cuatro mil bishitante. Como evento riba su mes sigur un exito. Pero, kico e audiencia aki ta bisa di nos mercado laboral mes? Ta tanto desempleado nos tin? Of ta un parti di e desempleadonan so a bishita e evento? Cuanto di e bishitantenan a bin pa curiosidad pero no ta hende cu ta busca trabao? Di esnan cu a bin tira un bista, cuanto ta emplea pero ta interesa pa cambia pa un empleo cu ta parce nan miho? Den ki tipo di trabao tabatin oferta y esnan buscando empleo, ki tipo di habilidad nan tabatin pa ofrece? Di antemano a anuncia cu tabatin como 400 cupo di trabao disponibel entre e entidadnan participante cu tabata busca empleado. Pa cuanto a logra haya empleado cu un profiel faborabel y pa cuanto no a haya, apesar di e asistencia di tanto hende?
Tur e preguntanan aki nos no ta haci nan pa ta fastioso, pero den un informacion mas detaya di un sondeo laboral, y por considera e evento un bon ocasion pa haci esey, tur e preguntanan aki ta meramente standard y indispensabel. Claro cu no tur contesta por ta cla caba pa informa publico, pero lo ta bon si nos por dispone di nan despues, pa por evalua unda nos ta para cu empleo y desempleo den nos pais awor. Pasobra si por contestanan anto nos ta haciendo un avance den coleccion di informacion y nos ta cuminsa supera un di e problemanan grandi y esey ta esun di falta di informacion corecto y detaya di mercado laboral. Pa hopi aña caba ta solamente un cifra pa aña ta duna di desempleo despues di e sondeo o encuesta cu a haci. Si e luna despues un par di luga grandi a cera nan porta, ya e cifra anual ey no ta corecto mas. Nos a yega di trece e tema di falta di cifra mas detaya y cu mayor frecuencia dilanti mas biaha caba, pero nos no ta ripara cu e critica constructivo aki ta yega unda e mester yega.
Awor, por puntra ta pakico ta insisti tanto den e asunto aki. E tin su splicacion. Si nos ta pretende cu nos tin un instancia gubernamental cu tin como tarea stimula y facilita e proceso di mercado laboral, tanto pa empleado como pa dunado di trabao, anto lo mester traha cu informacion detaya di kico mercado ta pidi y kico e grupo di desempleado ta ofrece. Ken ta e hendenan pa cual no tin trabao, pero cu ayudo di curso orienta riba drecha nan conocemento, ta logra prepara nan pa otro trabao pa cual si tin demanda. Y ta aki nos ta mira cu den e departamento aki practicamente no ta sali publicacion cu ta duna mas bista en detaye di e material aki. Y no ta trata solamente di informacion interesante y necesario pa instancianan oficial, manera un Banco Central y CBS, pero tambe pa hopi profesional den sector priva cu tin mester di e tipo di informacion aki. Esaki pa por prepara trabao profesional den varios tipo di analisis cu ta necesario den sector priva. Por ehemplo, pa evalua e parti di mercado laboral disponibel na momento di considera inversion mayor cu ta depende tambe di personal adecua na diferente nivel. E tempo anto cu un instancia gubernamental ta djis traha riba un par di dato cu ta parce nan suficiente, mester keda leu nos tras. Nos ta bibando den un mundo na unda disponibilidad di cifra confiabel y al dia di diferente indole ta esencial pa funcionamento di economia.
Un aspecto cu por yuda den esaki ta un miho participacion di e gremionan sindical y empresarial. Pa loke ta e tareanan di International Labor Organisation (ILO) practicamente tur cos ta funciona bao di e structura di consulta tripartiet, cu ta representacion di gobernacion, sindicato y dunado di trabao. Den e caso di tratado no. 88 “Employment Service Convention”, cu Aruba a ratifica, ta prescribi e participacion di representante di trahado y dunado di trabao den organisacion y operacion di y di desaroyo di maneho pa e servicio na e trahado a traves di un comision di conseho. Ta bira tempo pa nos gremionan sindical y empresarial cuminsa asumi nan responsabilidad tambe y exigi cu tin un consulta permanente riba tereno di empleo y cu ta provee e informacion al caso?
Tambe e tratado ta prescribi colecta informacion di informacion mas completo posibel, eventualmente den cooperacion cu otro autoridad, gerencia empresarial y sindicato, riba situacion di mercado laboral y e desaroyonan anticipa den esaki. E informacion aki mester pone na disposicion di otro autoridad, di organisacion di gremio y na publico en general. Apesar di tin un website di nos departamento d Labor cu cierto informacion general, no ta asina (ainda) cu tin informacion detaya di mercado laboral manera deseabel. Ta di spera cu e evento di siman pasa lo ta un estimulo pa sigui anto den e bon direccion.
