Segun Germille Geerman di Itza Pizza, un negoshi cu recien a establece su mes den caya grandi den forma di e Pop-up Cafe hunto cu Aruba Roasting Company, por bin hopi mas esfuerso pa trece bida bek na e caya. Tanto di parti di gobierno como di parti di comerciantenan.
Mirando discusion y esfuerzonan cu ta tumando luga den comunidad y na nivel gubernamental pa trece bida bek den caya grandi, Bon Dia a busca punto di bista di un establecimento relativamente hoben compara cu e otro negoshinan cu tin tempo ta existi na caya grandi pa asina posibelmente haya un perspectiva fresco. Segun sr. Geerman, hopi di e problemanan cu caya grandi ta enfrenta ta relaciona cu planning y ‘instancianan cu mester traha cu otro cu no ta trahando hunto’.
Ora a pidi pa ta mas specifico tocante e instancianan y retonan, sr. Geerman a nenga di comenta. Pero si e por a clarifica cu ‘hopi instancia ta inverti den bende bo e ‘look’ pero nan no ta guia bo unda of con pa experienci’e. Ta nice pa bo wak poster of potret bunita pero si hende no haya sa tanto bal’.
Aunke cu marketing ta e responsabilidad di negoshinan, sr. Geerman ta haya cu pa por trece caya grandi na nivel di un experiencia cultural, ‘tin mas gremionan cu ta envolvi cu mester haci nan huiswerk’. Por ehempel, ora personanan baha di crucero no tin un manera pa e turistanan haya sa kico tur caya grandi ta ofrece. Ademas ‘no tur cos ta hoyas, e isla tin hopi mas pa ofrece’.
Ademas sr. Geerman ta expresa cu gobierno lo mester bin cu mas iniciativa, specificamente cu mas creatividad den e manera con ta promove y fomenta proyecto den caya grandi. Aunke e ta compronde cu gobierno ta trahando riba e situacion actual, ‘nan mester haci’e mas facil pa comerciante por dal e stap. Presta placa ta un cos pero ora di paga bek con ta haci esaki pa evita cu negoshi bay fayit?’
Mester considera e-commerce
Sr. Geerman lo kier argumenta cu caya grandi tin mas potencial di loke ta wordo haci awo. Particularmente e ta haya cu por ofrece mas persona creativo incentiva pa por traha riba conceptonan pa trece bida bek na caya grandi. Ademas e ta haya cu mester ta mas creativo, tumando en cuenta e fenomeno di e-commerce cu hopi hende ta wordo atrai na dje pa via di prijsnan mas barata.
“Mester tene cuenta cu cambionan den mundo di comercio pa loke ta trata e-commerce pasobra moda y tecnologia ta move mucho mas lihe cu nos ta pensa.”
