Pa locual ta presupuesto di 2018 di pais Aruba, segun minister encarga cu Financia, Asuntonan Economico y Cultura, Xiomara Ruiz-Maduro(MEP), nan ta trahando riba esaki y ta premira cu esaki lo por keda cla rond april 2018. Rond di e fecha aki tambe e mandatario ta premira cu Aruba lo ta cla pa cuminsa haci prestamo cu inversionistanan internacional manera nos a informa siman pasa.
Nos ta bao di supervision financiero mester tene cuenta cu esey segun e mandatario. E ta bisa cu ora aña bolter, ley ta permiti bo pa haci uzo di cierto sumanan pa sigui tene gobernacion lorando. Mirando e retonan cu tin tambe, den e prome kwartaal di e aña aki si tum’e hopi amplio, pa luna di april lo mester ta cla cu presupuesto 2018, e ta splica.
“Den januari e negociacionnan politico tin cu tuma luga. E supervision bo no mester tum’e a la ligera. Hopi hende – sigur e gobierno anterior cu a ocasiona e caos cu ta pone nos bao e supervision financiero – hopi biaha no ta tene na cuenta kico esaki ta trece hunto cu ne na libertad cu bo tin como pais pa drecha bo mesun asuntonan. Pasobra aworaki nan cu bo ta bao supervision, y caminda bo a firma tambe cu bo kier bay bao cierto normanan. E ora bo tin cu bay haci cierto ehercicionan pa yega na e normanan eynan.” E mandatario ta bisa cu ta hopi facil pa bisa cu nan a trata un norma cu ta poni, pues ban hisa e impuesto pa yega na e placa anto cla. Bo a ‘onder de streep’ logr’e manera nan ta bisa den e CFT.
Falta di boluntad politico
“Largo bay, kico gobierno di Aruba a haci ta – cual ta e parti di manipulacion y cosmetica cu CFT a indica den tur su rapportnan – cosnan incidental pa nan yega na e normanan. Manera ban bende un par di edificio di gobierno pa yega na normanan di CFT y bisa cu nan a cumpli cu CFT. Pero nan no a haci nada di cambionan structural caminda tabata tin un reforma fiscal y trabaonan haci.”
Un reforma fiscal caminda mester a beneficia pueblo di Aruba segun minister Ruiz-Maduro, pa esaki no tabata tin boluntad politico pa haci e. Anto kico ta pasa ta segun e mandatario, bo ta keda hala e problema mas acerca. Pues den e situacion awor gobierno tin cu tuma pasonan concreto pero tambe presenta un plan cu ta ‘realistico’, segun e. “Tin hende cu ta trahando full-time riba e parti akinan awor.”
Mester tin un negociacion politico den e parti akinan e ta haya. Tur esaki ta pone cu e presupuesto cu bo mester presenta ya caba bo ta trata cu un buraco cu ta core den e 200 miyon, e minister ta splica. Sin cu ta hinca maneho nobo di gobierno den dje. Esey ta tuma mas tempo y tambe pasobra e gobernacion actual a trece dilanti cu e hende ta central, e ta bisa. “No por ta asina ki nan cu nos ta haci un operacion anto e pashent ta muri.”
Concretisacion di refineria
E minister ta ripiti atrobe cu e retonan t’ey, pasobra nos ta bao di supervision financiero y mester tene cuenta cu mundo internacional. “Nos tin cu tene cuenta cu e parti di e refineria por ehempel cu no ta mustra cu ta bay concretisa te aworaki manera mester ta. Si e ta bin acerca, esey tin di haber cu e crecemento economico cu nos tin cu tene cuenta cu ne ora di traha e presupuesto. Cu bo no por bisa cu bo ta bay conta cu un crecemento economico contando riba e hecho cu e refineria a habri y su efecto di spin-off cu tur esey. Nos tin cu conta cu uno cu no tine den dje,” e mandatario ta splica y cu esaki nan tambe ta tene cuenta durante e proceso di traha e presupuesto 2018.
