Ayera nos a topa cu Cuerpo Policial y Cuerpo di Bombero riba caya continuando cu nan control. Nan ta informa cu henter e proceso generalmente ta bayendo bon fuera di algun cos chikito cu ta ripiti nan mes tur aña. Cuerpo Policial a bira mas streng pa kitamento di permiso di esunnan cu no ta cumpli cu condicionnan stipula den ley.

Ferdinand Ponson di Cuerpo di Bombero ta bisa cu tin hopi di e luganan cu ta manteniendo nan mes na e reglanan cu mester mantene e aña aki. “Nos ta haciendo control severo riba nan.” Nan a topa cu entre otro klapchi cu no mester a ta riba caya na e momento ey, cu bendedonan cu sa cu e klapchinan aki no por wordo bendi y ta pone nan toch pa benta. Unabes cu topa cu esaki ta confisca e klapchinan mesora pasobra no ta permiti pa bende klapchi bieu. Comunidad mes ta yudando Cuerpo di Bombero señalando nan na e containernan cu nan mester controla. Ta papiando akinan di 85 sitio di bende klapchi segun sr. Ponson.

Vocero suplente di Cuerpo Policial Liliana Rasmijn a splica Bon Dia cu henter e proceso di control ta bayendo bon. Esaki a cuminsa diaranson 1’or di madruga sacando e containernan for di Wela.
Ta haci esaki na e oranan aki pa motibonan di siguridad pasobra ta polvo ta locual ta ser transporta. E control ta consisti di cooperacion di diferente departamento; Cuerpo di Bombero, DTI, Cuerpo Policial y DOW. Manera conoci, diaranson riba prome dia di control a topa cu container na supermercado NG’s Noord cu klapchinan bieu. “Y ora a sigui busca mas tabata tin diferente klapchi cu stickernan poni riba dje cu ta originalmente di 2014, y nan a pega sticker blanco. Nos a papia cu fiscal cu a duna ordo pa confisca henter e container,” sra. Rasmijn ta bisa.

Tambe e permiso a wordo kita di e persona aki unda cu pa e aña aki e no ta permiti pa bende klapchi. Pa otro aña mester bay papia riba esaki pa wak si e ta cay den consideracion pasobra ta hopi biaha caba a duna advertencia segun sra. Rasmijn. “Mi ta kere esaki ta algo importante, y ta hopi peligroso locual nos ta trata cu ne tur aña. Un biaha mas recordatorio pa tur comerciante; cumpli cu boso condicionnan manera stipula.”

Prohibi pa bende pa mucha bou 12 aña
Ayera durante control a topa cu un luga na rotonde di Tanki Flip cu su permiso ta duna un adres cu no ta cuadra unda cu e tin su luga para. Pues e luga ta wordo cera pa mand’e bay para na unda cu e adres ta wordo stipula den e permiso. “E condicionnan t’ey caba, nos ta haci hopi campaña di conscientisacion hunto cu departamento di Salubridad Publico. Loke nos ta recorda ta: ta prohibi pa bende muchanan bao di 12 aña klapchi, e mester ta compaña cu un mayor.”

Si constata cu bende un menor di 12 aña klapchi bo ta perde bo permiso pasobra esaki ta algo stipula pa ley, y tur hende sa esaki tur aña segun e vocero ta splica nos. E parti di DTI tambe ta streng riba e condicion di e luga. Cuerpo Policial ta mas basa riba e orario cu ta ser habri y cera, pasobra segun ley e orario ta for di ora cu solo sali te cu 9’or di anochi. “Mayoria biaha nos ta haya basta bon cooperacion pero semper tin un of otro cosnan cu por pasa cu tur aña. Mayoria biaha ta mesun personanan,” sra. Rasmijn ta bisa. Y aworaki segun e ta sigui splica Bon Dia, polis ta hopi mas streng y por bay over na kita permiso na cualkier momento pasobra esey ta nan autoridad.

Bendedonan mucho cerca di otro
A tuma nota cu tin algun luganan/trailer di bende klapchi cu ta mucho cerca di otro. Segun sr. Ponson di Cuerpo di Bombero, e comerciantenan mes mas tanto mester percura pa nan no yega asina cerca di otro pa nan propio competencia. “Den mi parti mes ami no ta hay’e logico pa tin tanto luga cerca di otro asina. Pero nan ta dicidi unda nan kier pone nan trailer. Nan ta na un distancia leu di otro di manera cu e no ta forma peliger cu nos mester bisa pa haci algo pa prevencion,” segun sr. Ponson. Cuerpo di Bombero ta haci apelacion na esunnan cu ta tira klapchi pa tene cuenta cu trafico y tirando klapchi riba caminda ora autonan ta pasa. Ora tira klapchi mester tene cuenta pa uza mecha largo, no uza sigaria of cualkier otro cos cu no ta un mecha largo traha specificamente pa cende klapchi.