Recientemente a tuma luga un reunion entre e parlamentario Robert Candelaria (AVP) y drone racer Vincent ‘Vince Irie’ Tonk. Sr. Candelaria tabata ocupa cu un proyecto di ley, unda kier reglamenta e uzo di drone na Aruba, pa asina asisti e cadena hudicial, segun e relato ricibi.
Durante e reunion Vince Irie a splica mas tocante uzo di drone. Durante campaña sr. Candelaria tabata papia hopi di esaki, unda cu lo bin cu drone pa bula na Aruba pa asisti e cadena hudicial. Pero e kier bay mas aleu cu esey pa reglamenta drone, esta pa via di reglamente esaki como deporte. Esaki ta nifica cu tin hendenan cu tin e hobby y ta den e mundo di drone, con nan por facilita pa regla con nan ta haci den nan mundo, pero tambe e parti hudicial.
Lo tene cuenta riba siguridad y tur aspecto necesario pa ora cu ta den e mundo di drone, tur cos bay corecto y den un manera safe y ta na beneficio di tur. “Esey aworaki mi ta tumando y buscando informacion”, asina sr. Candelaria a expresa. Vince Irie a comparti su experiencia y experticio, unda cu poco poco e ta formando e imagen unda kier yega cu leynan pa Aruba cu drone.
Vince Irie -cu ta un drone racer profesional- a splica cu e concepto di drone ta pa pusta drone rond di un drag di cual nan ta pasa obstaculo. Den e competencia 4 drone ta bay halto pareu y esun cu yega prome ta gana. Na e momentonan aki tin campeonatonan mundial di drone y Vince Irie a participa na nan. Esaki ta un deporte grandi y durante e reunion cu parlamentario Candelaria, el a papia riba e deporte y kico por haci esaki pa Aruba, tene safe y hacie dibertido pa tur hende.
