Gobierno Arubano ta preocupa pa e menasa di e presidente Venezolano Nicolas Maduro pa para tur trafico comercial entre su pais y islanan ABC. Prome minister Evelyn Wever-Croes ta reconoce na Ret Karibense cu e motibo pa e menasa, esta negoshi di contrabanda, ta e problema.

Ayera un audio tabata circulando unda supuestamente presidente Maduro a declara cu lo cera e frontera cu e islanan entrante di 31 di december. Sinembargo Consulado di Venezuela ta bisa Bon Dia cu tin hopi rumor ‘pa descredita’ e gobierno y segun nan no tin informacion oficial indicando un ceramento.

Prome Minister Wever-Croes ta bisa cu el a tuma contacto directo cu ministerio di Asuntonan Exterior Hulandes, como cu relacionnan cu exterior di Aruba ta un asunto di Reino. A palabra cu hunto lo sigui e desaroyonan cu hopi atencion. Un paro di exportacion pa Aruba lo toca e isla, e prome minister ta bisa.

Diaranson presidente Maduro a bisa na television nacional cu el a contempla seriamente di para trafico comercial cu e islanan ABC. Motibo pa esaki ta e ‘contrabanda di producto di e pais pa mafia na e islanan’. E scarsedad actual na Venezuela lo ta un consecuencia directo di esaki. Tambe sr. Maduro a anuncia di a ‘planea un sorpresa chikito’ pa e islanan. No ta cla ta kico e kiermen cu esey.

Contrabanda
Sra. Wever-Croes ta haya cu e iritacion di sr. Maduro ta klop si. “Nos tambe ta haya cu mester trata contrabanda. Nos no por haci manera e no ta sosode.” Ultimo añanan banda di contrabanda di gasolin na gran escala, traficacion di hende, contrabanda di arma i di droga for di Venezuela a aumenta hopi.

Segun e prome minister awor ta importante pa gobierno di Aruba pa aumenta e proteccion di e fronteranan na costa. E ta bisa cu na nivel administrativo a comunica cu e consul Venezolano na Aruba ku Aruba lo baha mas fuerte riba contrabanda pa y for di e pais bisiña.

Fruteria
Yadira Acosta ta maneha un di e hopi fruterianan chikito na Aruba caminda ta bende berdura, fruta y hopi sorto di keshi. Specialmente e productonan fresco cu e ta bende ta bini tur siman for di Venezuela via barco cu ta mara den haf di Barcadera. “Nos productonan fresco ta bini djey pasobra e distancia ta mas cortico” segun e. E resto ta bini di Colombia.

E ta sigui bisa cu si tur e trafico for di Venezuela para di berdad, no ta tienda manera di dje so lo sufri. “Tur warehouse y supermercado lo sinti e consecuencianan mesora.”

Mester papia
Segun e comerciante no ta prome bia cu sr. Maduro ta expresa su mes. Algun aña pasa pa un temporada cortico a limita e suministro di berdura y fruta. A pone cuota riba cierto producto. Esaki a causa reki bashi den supermercadonan Arubano, cu mester a desvia pa suministrado na Republica Dominicano. “Mi no ta kere cu esaki lo sosode atrobe dje lihe ey” e ta haya. “Pero mi ta haya si cu gobierno Arubano mester papia cu esun di Venezuela.”