Caracas – E decision di e Asamblea Constituyente estilo Cubano di declara ilegal e partidonan politico Voluntad Popular (VP), Primero Justicia (PJ) y Accion Democratica (AD), pasobra nan no a participa na e eleccion pa alcalde realisa dia 10 di december ultimo, segun e partidonan ta viola Constitucion y e derecho di participacion politico di e Venezolanonan, asina nan a declara den un comunicado conhunto.
E tres partidonan, entre e forsanan politico mas importante di e pais, a haci un yamada na comunidad internacional, “specialmente na Presidente di Republica Dominicana, Danilo Medina, y na e mision di canciyer, e garante di e proceso di negociacion, encuanto e accionnan nobo aki, cu sin duda ta representa un burla di e esfuerso di concertacion y paz na nos pais.”
Tambe Asamblea Constituyente a tuma paso contra oposicion den e pais, eliminando dos alcaldia den man di oposicion. Alcaldia Metropolitano, cu tin hurisdiccion riba e cinco municipionan cu hunto ta conforma Gran Caracas, tabata den man di oposicion desde 2008, tempo cu e actualmente exilia opositor Antonio Ledezma a gana eleccion. E alcaldia di Caracas ta wordo considera e institucion municipal mas poderoso di e pais. Tambe a elimina e alcaladia di Alto Apure, den parti oriental di e pais, cu tambe tabatin un alcalde di oposicion. .
