Ayera mainta Bon Dia Aruba a ricibi un e-mail cu na prome instante a mustra manera un comunicado di prensa for di Departamento Meteorologico. Pero esaki ta un e-mail cu ta parce ta bini for di algun empleadonan malcontento di Departamento Meteorologico cu ta desea di cambia e director. Esaki no ta prome biaha cu problemanan interno den e departamento ta bin dilanti unda cu hasta menasa ta cay riba pone trabao plat entre otro na Aeropuerto. Sindicato TOPA ta informa cu nan ta wardando riba contesta di minister nobo encarga cu Transporte, Comunicacion y Sector Primario pa tene un reunion urgente riba Meteo.

Algun tempo atras tabata tin henter un situacion tocante algun computer cu aparentemente lo a wordo kibra den e departamento di Meteo, y tambe a bin dilanti malcontento di empleadonan cu e director mas trempan e aña aki prome cu eleccion. Sindicato TOPA ta na altura di e malcontento cu ta reina na meteo segun Rene Bernabela ta bisa Bon Dia.

Sr. Bernabela ta splica nos cu e sindicato ya caba a manda un carta pa e minister nobo, caminda meteo ta resorta bou di su persona, pa asina nan por haya un reunion cu su persona. Sr. Bernabela: “Pero mi tin cu bisa cu te cu dia di awe e minister en cuestion cu ta minister Chris Romero(MEP) no a reacciona ariba nos carta. Nos ta wardando ariba contesta di minister Romero pa asina su persona yama un reunion urgente cu sindicato TOPA.”

E e-mail cu nos a haya ayera ta informa lo siguiente: Cu aeropuerto Internacional Reina Beatrix ta coriendo riesgo pa cera durante dianan di fiesta pa via di malcontento grandi den departamento di meteo. Esaki despues cu gran parti di empleadonan ta hopi disgusta cu e maltrato cu nan ta pasando aden, no solamente ultimo lunanan, pero ultimo añanan segun e e-mail ta indica. Segun e e-mail ta indica, ta asina cu Marck Oduber pa di cuater biaha e aña aki a keda sin paga su empleadonan gran parti di nan salario (overtime + toelage nan di warda). Esaki despues cu el a instala tres camara ilegal bek na meteo.

E e-mail ta sigui bisa cu: “Ta fresco den tur nos memoria ainda con na comienso di aña ex minister Mike de Meza a pone sr. Oduber kita e camara nan, pero ta parce cu meneer Oduber ta purbando su suerte atrobe cu e minister nobo di Transporte Chris Romero.” Meneer Oduber a bay asina leu e biaha aki pa fabrica evidencia y culpa un empleado pa destruccion di un propiedad di gobierno, haciendo cu e empleado aki a haya un schorsing di seis siman segun e e-mail ta sigui informa. Esaki pa hopi hende tawata e ultimo druppel di e hemchi. Na e mes un manera aki sr. Oduber tin añanan ta abusa di su poder, pero e biaha aki el a dicidi di bay un stap mas leu y envolvi polis y prensa den su maltrato.

‘Lista largo di problema’
Apart di esaki tin un lista hopi largo mas di problema nan serio andando ultimo añanan na departamento meteorologico segun e e-mail ta sigui detaya. Empleadonan di departamento meteorologico ta hopi desapunta den gobierno anterior cu tawata na altura di tur esaki pero a kies pa permiti tur esaki pasa y ta sperando cu minister di transporte sr. Romero si haci lo corecto. Marck Oduber ya no tin ningun sorto di confiansa mas di su empleadonan y p’esey nan tur urgi minister Romero pa pone un stop na e abusonan aki. Situacion na departamento meteorologico ta empeorando cada ora mas y empleadonan ta sperando cu nan minister sali bin dilanti pa pone un stop na esaki prome cu aña cera. No tin nada mas frustrante cu inhusticia di e forma aki cu ta wordo defende por medio di un gabinete, pero empleadonan di departamento meteorologico tin confiansa cu minister Romero ta un persona honesto y lo pone un stop na tur esaki.

Bon Dia a purba tuma contacto cu vocero di Aeropuerto pa wak si nan ta na altura di algo pero no a haya un reaccion. Nos wordo informa for di vocero y fuentenan di ministerio di Transporte, Comunicacion y Sector Primario cual ta cay bao di minister Romero (MEP) – cu esaki no ta e situacion cu lo por spera un strike den dianan di fiesta na aeropuerto. Nan a basicamente desmenti henter e asunto. Minister Romero mes no ta na Aruba pues nos no a logra comunica cu e mandatario directamente riba esaki, cual nos lo haci manera nos haya e oportunidad.

Bon dia Aruba a comprende for di vocero di ministerio di Transporte cu tur cos ta bao control na momentonan aki y hendenan no tin mester di drenta den panico cu lo tin un welga na aeropuerto. Bon Dia lo sigui e desaroyo di e situacion aki y busca un reaccion for di e director di meteo riba e ponencianan menciona.