Diahuebs mainta nos a ricibi un comunicado di prensa for di Departamento Meteorologico unda e departamento ta subraya cu nan ta sinti a yega tempo pa cambia e director.
E comunicado ta informa lo siguiente:
Aeropuerto International Reina Beatrix ta coriendo riesgo pa cera durante dianan di fiesta. Esaki despues cu gran parti di empleadonan ta hopi disgusta cu e maltrato nan pasando no solamente ultimo luna nan, pero ultimo añanan segun departamento di Meteo.
Ta asina cu Marck Oduber pa di 4 biaha e aña aki a keda sin paga su empleadonan gran parti di nan salario (overtime + toelage nan di warda). Esaki despues cu e la instala 3 camara illegal bek na Meteo, nan ta informa. “Ta fresco den tur nos memoria ainda con na comienso di anja Minister Mike de Meza a pone Meneer Oduber kita e camara nan, pero ta parse cu Meneer Oduber ta purbando su suerte atrobe cu Minister nobo di Transporte Chris Romero.”
Meneer Marck Oduber a bai asina leu e biaha aki pa fabrica evidencia y culpa un empleado pa “destruccion” di un propiedad di gobierno, haciendo cu e empleado aki a haya un schorsing di 6 siman segun e departamento ta sigui informa. Esaki pa hopi hende tawata e ultimo druppel di e hemchie. Na e mes un Manera aki Marck Oduber tin añas ta abusa di su poder, pero e biaha aki e la dicici di bai un stap mas leu i envolvi Polis i prensa den su maltrato.
Lista largo di problema
Apart di esaki tin un lista hopi largo mas di problema nan serio andando ultimo añanan na Departamento Meteorologico. Empleadonan di Departamento Meteorologico ta hopi desapunta den Gobierno anterior cu tawata na altura di tur esaki pero a kies pa
permiti tur esaki pasa y ta sperando cu Minister di transporte Chris Romero si haci lo correcto. Marck Oduber ya no tin ningun sorto di confiansa mas di su empleadonan
y p’esey nan tur urgi Minister Chris Romero pa pone un stop na e abusonan aki.
Situation na Departamento meteorologico ta empeorando cada ora mas y empleadonan ta sperando cu nan Minister sali bin dilanti pa pone un stop na esaki prome cu aña cera.
No tin nada mas frustrante cu inhusticia di e forma aki cu ta wordo defende por medio di un Gabinete, pero empleadonan di Departamento Meteorologico tin confiansa cu Minister Chris Romero ta un persona Honesto y lo pone un stop na tur esaki.
Update:
Bon Dia a purba tuma contacto cu vocero di Aeropuerto pa wak si nan ta na altura di algo pero no a haya un reaccion. Nos wordo informa for di vocero y fuentenan di ministerio di Transporte, Comunicacion y Sector Primario – cual ta cay bao di minister Chris Romero (MEP) – cu esaki no ta e situacion cu lo por spera un strike den dianan di fiesta na aeropuerto. Minister Romero mes no ta na Aruba pues nos no a logra comunica cu ne directo riba esaki cual nos lo haci manera nos haya e oportunidad. Nos a compronde for di vocero di ministerio di Transporte cu tur cos ta bao control anto a desmenti locual e comunicado a trece dilanti. Bon Dia lo sigui e desaroyo di e situacion aki y busca un reaccion for di e director di Meteo.
