Y ainda falta…

Tur siman ta parce cu e gabinete nobo tin un par di sorpresa pa comunidad. Mas tanto nan no ta pa alegra nos. Nos no ta kere cu nan ta haci esaki pa molestia; al fin y al cabo, nos mester haya sa, mal noticia of no. Pero e impresion ta si cu e gobierno nobo den e asunto aki a adopta e lema di e contrincante politico di ‘y ainda falta’…

E ultimo noticia ta cu gobierno anterior no a paga AZV tur e primanan di BAZV y di AZV, cu nan mester a haya. Segun declaracion di ministro encarga cu Salubridad Publico, e suma ta yega Afl. 46 miyon. Ademas gobierno lo ta debe ATA Afl. 22 miyon, loke hunto ta casi 70 miyon cu cierto momento lo mester paga ainda.  Asina ta parce cu financia di Aruba tin mas buraco cu e caminda di Rooi Frances, y como agravante nan ta mas dificil pa yena tambe.

Pero en fin, lamento ni zundramento a yega di produci algo; simplemente lo mester busca manera pa surpasa e dificultadnan aki. Sinembargo, nos ta keda cu un sabor amargo y sospechoso di henter e asunto aki. Si nos no ta ekiboca, nos no a haya ningun señal di e situacion adverso y incorecto aki durante cu e gobierno di cinco strea tabata sinta ainda. Atrobe e mesun pregunta: ta asina monstruoso e gobierno ey tabata, cu ningun hende tabatin e curashi pa alerta comunidad di kico tabata pasando? O ta considera normal cu gobierno ta regula su cashflow ‘cómo y cuándo le dé la gana’ kedando cu placa di AZV, SVb, APFA, ATA, etc.?

Y nos ta bay un stap mas leu. Pakico nos tin un comision instala bao di un ley, aproba bao presion Hulandes (CAft), cu mester controla gobierno su bukinan cada tres luna, si awor no mas ta bin resulta cu gobierno aparentemente a wanta tanto placa atras? No ta nan tarea pa detecta e tipo di triki aki y coregi esaki, o sikiera mencion’e? Pasobra bo no mester ta un experto financiero pa sa cu si gobierno no a paga, anto AZV no por tine den su caha o na banco. 46 miyon florin na entrada di BAZV ta mas o menos cuatro luna di entrada cu no a haya ainda, tumando como punto di salida cu e aña aki AZV mester haya como 130 miyon na aportacion di BAZV.

Nos no por kere cu e tarea di supervision di e comision no ta bay mas leu cu haya e rapport di gobierno cada tres luna, tira un bista ariba esaki mientras ta disfruta di un bon koffie o algo mas fuerte, anto duna un comentario. Si nos no ta kiboca, e ley ta prescribi cu gobierno mester duna CAft cualkier informacion cu nan ta considera necesario pa nan trabao, incluyendo e datonan administrativo di e diferente entidadnan cu ta conforma e asina yama sector colectivo. Si esey te awor no tabata necesario segun nan, anto ora den futuro si cuminsa haci uzo di e poder aki, nos lo tin gana di sa di nan ta kico a cambia anto, cu den e tempo nos tras gobierno por a hunga cu placa manera ta haya ta bon, y ta awor no mas aparentemente hende a cuminsa haya nan capacidad di papia atrobe. Manera bisa anteriormente: asina hopi miedo e hendenan aki tabata causa?

E ta haci nos corda un chiste cu nan ta conta di e resistencia Hulandes durante e ocupacion Aleman den segunda guera mundial. Despues di guera a resulta cu un cantidad enorme di hende tabata bati riba pecho cu nan tabata participa den e resistencia. Loke a ocasiona e observacion chistoso: Conchale, si e Alemannan tabata sa cu ta asina hopi hende tabata conspira contra nan, nan lo no por a drumi ni un anochi trankil…”

Pero tin otro aspecto mas na e asunto aki. Esey ta e manera cu ta maneha e conteo di beneficio y entrada cu e diferente partnernan den e sector colectivo tin. Ta masha bunita pa ora gobierno central tin un deficit di 100 miyon, ban bisa, pero e fondonan di por ehemplo AZV y SVb tin un surplus, pa opina cu  e imagen total ta positivo, pero bo no por kita placa di AZV hinca den caha di gobierno ora esaki falta placa.

Ta gobierno si tin un obligacion pa compensa e deficitnan di AZV y SVb, di manera cu, si dado caso gobierno tin un deficit y AZV tambe, e ora e situacion ta bira mucho mas grave cu e tabata pa gobierno  so, pasobra e no por sconde pa e obligacion legal di compensa tambe e deficit cu e fondo tin. Den e sentido aki e manera di reacciona di CAft riba e ultimo rapport di kwartaal 3 no ta parce corecto, unda nan ta suma y kita beneficio y deficit di otro entidad, pasobra ta solamente e entidadnan cu por pasa placa pa gobierno realmente por haci un contribucion na mehora estado financiero di gobierno. En todo caso, pa basta tempo ainda CAft lo mester bay Bonaire pa haya un splicacion ta kico a sucede…