Den cuadro cu e asunto di ekiponan di prensa cu ta haci falta den Bestuurskantoor, despues di dos detencion – di cual ambos persona ta liber awo -ainda tin hopi pregunta habri. Ministerio Publico ta encarga cu e investigacion aki. Unda ainda no ta conoci kico a pasa cu tur ekiponan cu tin un balor conhunto di riba 100.000 florin, segun gobierno.

Despues di e yamada di dialuna ultimo di conferencia di prensa di gobierno tocante ekiponan di Bestuurskantoor, mas hende a cuminsa trece ekiponan segun prome minister Evelyn Wever-Croes (MEP) a bisa ayera.

Ex coordinadornan di un minister (cu e no a menciona) a trece ekipo bek. Nan a caba di ricibi un carta por medio di un abogado for di un ex minister cu awor ta corda cu el a bay cu cierto ekipo y ta ofreciendo pa cumpra nan. “Nos como gobierno responsabel no por tin miedo cu si nan ta tilda nos cu persecucion politico anto p’esey nos no ta haci nada. Nos ta bisa cu e ekipo aki tin cu bin bek pasobra gobierno tin mester di dje pa por funciona, premier ta bisa. Cierto ekipo a wordo paga door di Elmar, Utilities y ATA kisas pero nan no ta papiando di esakinan. E mandatario ta bisa cu ta papiando di e ekipo di mas di 100.000 florin cu a wordo cumpra door di Departamento di Financia cu awor no t’ey mas.

E investigacion aki ta bao guia di un instancia independiente, cual ta Ministerio Publico y rol di minister di Husticia no ta pa bay drenta den detaye di e investigacion cu ta andando te ainda. Esaki minister di Husticia Andin Bikker (POR) ta contesta Bon Dia Ayera riba kico ta e status di e asunto aki ya cu a libera sospechosonan cu a keda deteni. Opositornan ta keda clasifica esaki manera un definitivo abuso di poder y persecucion politico. ” Nos a haya un Bestuurskantoor hopi bashi y den e proceso e investigacion tambe ta andando. Y ta resultado tambe di e hecho cu e gobierno saliente no a percura pa un traspaso debido. Awo como gobierno responsabel bo mester entrega e kehonan concerni pa bo por recobra e propiedadnan di pais Aruba.”

Minister Bikker a bolbe enfatisa cu ambtenaarnan den servicio di gobierno mes mester a bay dilanti hues pasobra gobierno a entrega keho cu nan a bay cu un printer. Manera nos a compronde, Departamento di Fiansa a indica cu e suma cu nan a haya pa loke ta e aparatonan cumpra, no ta cuadra cu e aparatonan cu a haya. Pues cu por tin un parti di e ekiponan aki un otro caminda, pero tur esakinan ta detayenan di e investigacion cu durante di e proceso lo mester wordo confirma ora e wordo conclui, segun minister Bikker.

Gobierno ta laga sa cu nan no ta esunnan cu ta investigando pa awo opositornan cuminsa bisa cu esaki ta persecucion politico pasobra tin hende liga na nan cu ta formando parti di esaki. Ta den e transcurso di e investigacion a bin resulta cu tin personanan liga na gobierno anterior considera sospechoso door di e team di investigacion, segun gobierno.

Regla tin cu conta pa tur hende
E prome minister ta bisa cu den e caso aki ta importante pa pone emocion un banda anto mira e esencia. Cual ta cu gobierno a cumpra ekiponan specialmente pa prensa/media cual no t’ey mas. E ta un señal cu gobierno a haya for di miembronan di prensa cu tabata custumbra di bin Bestuurskantoor y mira tur sorto di ekipo sofistica, cu segun Departamento di Financia gobierno di Aruba a paga pe. Esaki a cuminsa for di prome dia cu nan a drenta gobernacion segun e premier, unda cu nan mester a bay te na su pia di trabao y trece e camaranan bek. Gobierno ta subraya cu nan no a entrega keho cerca un hende specifico, e keho tabata riba e cosnan cu no t’ey mas. “Nos por trata e cos aki hopi emocionalmente cu si tin corupcion of persecucion politico. Pero si bo tin algo cu abo a paga pe anto otro hende bay cu ne, e ta fout. Anto esey nos ta tratando.”