Polis a deteni tres persona despues cu gobierno a entrega keho di hortamento di ekipo audiovisual den Bestuurskantoor. Un ya ta den libertad bek, esta Luigi Petrocchi.
Esun cu ta keda den detencion despues cu hues comisario a extendi nan detencion, ta entre otro Marko Espinoza kende a traha ocho aña como hefe di prensa di gobierno. Tambe autoridadnan a tene un entrada hudicial den un apartamento di un otro sospechoso. Nos a purba di combersa cu sr. Espinoza algun dia pasa relaciona cu rumornan cu canal ATV ta bay habri bek pero no a haya contestanan directo for di su persona. Investigacion ta andando ainda. Ta hopi ekipo a somenta. Y nan mester wordo recupera pasobra nan a wordo cumpra cu placa di pueblo. Ta papiando aki di computer nan y camara sofistica, server nan y hopi mas. Gobierno nobo solamente a haya algun material so di trabao di tur e otro cosnan cu ta haci falta, segun informacion cu nos a haya for di PR di ministerio di Husticia.
Segun notificacion aki ‘ta ampliamente conoci cu ta falta hopi ekipo den Bestuurskantoor’. E ekiponan mas obvio cu a wordo horta segun nos ta wordo informa ta audiovisual. E comunicado di gobierno ta sigui relata cu tur miembro di prensa semper a mira e aparatonan sofistica cu gobierno di AVP tabata tin. Awor prensa por a mira tambe cu e ekipo cu gobierno nobo tin ta di calidad inferior. Algun dia atras mes por a mira un discusion riba esaki unda algun miembronan di prensa tabata cuestionando unda e ekiponan aki a bay.
Den conferencia di prensa ministernan a menciona esaki na mas di un ocasion tambe.
“Nos a laga haci investigacion administrativo cu tur e recibonan cu gabinete Mike Eman a cumpra na material y ekipo,” gobierno ta informa. Y nan a entrega keho na husticia.
