Atencion di prensa no mester mengua
Ayera a tuma luga e momento culminante den e tragedia cu dos victima hoben envolvi. Pa tur famia y otro persona cerca di nan e comienso di un periodo unda nan mester haya e trankilidad pa nan procesa y atende nan dolor. Esey significa cu prensa no mester envolve nan innecesariamente den publicidad, sigur si nan mes no ta busca esey. Di mes lo tin e momentonan doloroso, ora e caso contra e autornan den e morto di e dos muchanan yega na corte, y no ta trabao di prensa pa haci e asunto mas penoso cu e ta caba.
Esaki no significa cu nos mester lubida henter e caso. Di hopi banda a bisa cu mester percura pa e cos horibel aki no ripiti nunca mas. Completamente di acuerdo, y esaki significa cu esunnan cu tin responsabilidad den esaki ta esunnan cu nos como prensa no mester duna oportunidad pa nan bay soño. Manera e mandatario encarga cu asunto social a declara dilanti prensa, tin hopi trabao pa haci. Y e trabao ta awor. Miho bisa, e ta cuminsa awor, pero no ta bay caba, nunca. Pasobra loke nos mester construi ta un sistema di vigilancia solido y eficaz, cu pa tempo indefini mester garantisa cu en berdad algo asina no por ripiti.
Manera nos por a ripara den prensa, e prome pasonan pa reuni e entidadnan cu mester hunga un papel den e red di vigilancia aki, a tuma luga caba y ta spera cu pronto nos por tende o mira e prome resultadonan di esaki. Ta di spera tambe cu e no ta keda na un rapport diki cu ta haya conveniente sepultura den diferente lachi na diferente despacho. Y nos no ta bisa esaki pa cinismo, sino basa riba mal experiencia den un sinfin di caso. Y e base di e mal experiencia ta e forma tradicional di traha den gobierno, unda mester cambio fundamental.
Pa cuminsa, gobernacion mester kibra cu cierto tradicion den trabao gubernamental cu tendencia di pospone tur cos cu por haci awe, pa mañan. Sigur ora ta trata di interes y hasta bida di mucha y hoben, nada pa mañan y tur cos awe… Diligencia ta algo cu un mester exigi di otro, y no acepta cu retraso ta tuma luga. Si esaki ta exigi intervencion di e mandatarionan responsabel, mester haci esaki, sin miedo, y sigur no pa e mentalidad di ‘isla’ di cada departamento o ministerio. Esey mester caba.
Otro aspecto clave ta cu mester comparti informacion maximalmente cu publico. Aki mester mira un cambio grandi den manera di opera. Te awe e tradicion ta cu ta trata ciudadania manera un set di mucha chikito cu no ta comprende nada toch, y no ta duna informacion cu tur parti di mundo ta considera algo masha normal. No mester ta asina cu algo malo mester pasa pa diripiente nos mira cifra ta subi mesa. Unda nan tabata tur e añanan ey anto?
Nos ta corda cu aña pasa redaccion di e corant aki tabata busca informacion tocante incidente di enfermedadnan transmiti pa sangura, y specialmente e pregunta si nos tabatin caba o no, un situacion di epidemia segun su definicion internacional. E asunto a bira fastioso, pasobra supuestamente esunnan cu a papia no tabata autorisa, pero esunnan cu por, no tabata papia… Y pakico no? Pasobra basicamente e pensamento ta cu nan ta defini kico e pueblo por haya sa. Desde ki tempo ta gobierno(nan) ta defini pa e ciudadania ta kico nan mente por soporta? Nos ta comprende cu e mentalidad aki, pa cual no mester culpa necesariamente e mandatarionan di e momento so, ta algo cu tin raiz profundo den henter e aparato gubernamental. Leynan cu explicitamente a defini derecho di ciudadania di haya informacion no a cambia nada den esey.
Tambe informacion cu ta duna e ciudadano den e asuntonan trata aki, mester core di forma diferente. Cu esey nos no ta referi na e prome puntonan di contacto den e sistema. No ta suficiente pa bisa un ciudadano cu ora e mester denuncia un caso, unda e mester acudi prome, y punto. Un hende lo tin gana di sa kico ta pasa despues; na ken ta referi despues, kico ta e garantianan di confidencialidad cu tin (hopi importante), etc. Papiando di confidencialidad, un di e prome cosnan cu mester implementa ta e famoso ‘meldcode’ pasobra sin esaki e trahadonan profesional tampoco lo tin e proteccion cu nan mester. Y den un comunidad asina chikito e cosnan aki ta di mas importancia ainda. Tin un motibo special pakico nos no ta yega asina leu? Pasobra no ta awor so ta tende di e aspecto indispensabel aki, cu no ta bira vigente.
Ta importante cu nos tur ta realisa cu nos comunidad ta padece di un malesa mahos, y cu cura esaki ta rekeri forsa y curashi, sigur ora bo topa cu un caso. Por ta bo conoce e victima, pero que hubo ora bo ta famia di e victimario? diripiente e lema di no lubida e dos criaturanan aki no ta gratuito ni facil mas. Nos lo lubida nan si nos djis crea algun simbolo, nada mas.
