Awe tabata e fecha pa trata e caso fatal di tiramento cu a tuma bida di un dama nacionalidad Chines na Wayaca aña pasa. Pero pa motibo cu un di e sospechosonan no por haya abogado ainda, mester pospone e caso aki atrobe pa un otro fecha.
Ministerio Publico ta informa Bon Dia cu por supuesto cu e sospechoso nacionalidad Chines Steve Fan lo mester haya un abogado di Land Aruba cualkier cu lo ta riba piket. Ultimo e tabata tin un abogado di Hulanda. Na prome instante manera nos a informa, a presenta algun asuntonan administrativo cu e abogado di sospechoso Steve Fan a enfrenta.
Locual nos a compronde for di abogado Chris Lejuez algun dia pasa kende tabata defende Steve Fan, sr. Fan tabata kier a busca un abogado hopi renombra na Hulanda Gerard Spong pa su defensa. Abogado Lejuez a hala atras pa sr. Spong tuma over e caso. E siguiente simannan sr. Fan mester regla su abogado pa e caso aki unda cu e lo mester haya su mes kisas ta hasta ta busca un otro abogado atrobe. “E caso aki ta hopi complica, bo tin mester di un abogado”, sr. Lejuez a comenta na Bon Dia.
Awe fiscal lo mester a duna splicacion na hues riba e ultimo desaroyonan. E otro sospechoso di nacionalidad Boneriano si tin su abogado normal manera nos a compronde for di Ministerio Publico.
Un aña despues di caso
Ya nos a pasa un aña despues di e caso aki unda cu na prome instante no tabata mucho cla si e tabata un caso di atraco cu a bay robes. E victima den e caso aki tabata un dama di nacionalidad Chines inicial S.S.K.F.F. cu a ricibi un tiro den cabes cual a causa su morto riba 13 di december 2016. Despues di dos entrada hudicial, polis a pone man riba dos sospechoso. Esaki pues a pasa algun siman despues di e suceso unda cu na Pavia 52 a detene comerciante Steve Fan di Stevie Ice Factory como sospechoso. A detene un di dos persona tambe di nacionalidad Boneriano cu aparentemente ta traha pa Steve Fan. Na Pavia polis tambe a haya e pickup cu testigonan a mira ora a busca e sospechoso di e tiramento patras di veld di Sportboys na St. Cruz.
