(BioBio).- Pueblo Cubano a eligi diadomingo ultimo nan autoridadnan municipal, den un proceso sin ningun candidatonan di oposicion. E proceso di eleccion aki ta prepara e caminda pa eleccion di e proximo presidente cu lo sustitui Raul Castro na 2018. E proceso lo ta e prome cambio den posicion di presidente den mas di seis decada.
Mas di ocho miyon Cubano mayor di 16 aña di edad ( riba un poblacion di 11,2 miyon) a ser yama pa participa, via voto directo y secreto na Cuba. Den e proceso di eleccion pueblo Cubano mester a eligi 12.515 concejal entre mas di 30.000 candidato, cu a ser proponi den ‘Asamblea Vecinal.’ Ningun di nan ta parti di oposicion.
E proceso a ser celebra despues di conmemoracion di prome aniversario di fayecimento di Fidel Castro. Castro a cuminsa cu un regimen di un sistema politico unipartidista na 1976 na Cuba y cu ainda ta e sistema electoral, conoci como e sistema politico electoral di poder popular. La Habana ta defende e sistema aki como esun mas democratico y transparente di nan historia. Oposicion ta pensa cu e sistema aki ta un engaño.
Eleccion aki ta e prome paso di un proceso cu mester keda cla na luna di februari, cu eleccion di un sustituto di presidente Raul Castro. Castro tin 86 aña y el a ser re-eligi na 2013, pa su ultimo mandato di 5 aña.
Su sucesor no mester tin un fam manera Castro, y tampoco mester ta parti di e revolucion historico di Cuba.
Tur pronostico ta bisa cu e prome vice-presidente Miguel Diaz Canal, ingeniero di 57 aña, por ta e proximo presidente di Cuba. E tin mas di 3 decada trahando cu Raul Castro.
Sin embargo, nada ta sigur tocante e situacion dentro di partido comunista, unda actualmente Raul Castro tin e principal posicion politico. E proximo congreso lo ta na aña 2021 y Raul Castro lo tin 90 aña edad pa e tempo ey.
