Reparticion di cartera manera anticipa

Porfin Aruba tin un gobierno nobo. A tuma algun tempo y ban spera cu esey lo tabata util pa yega na un gabinete balansa. Sorpresa no tabatin tanto, den e sentido cu e top di e partidonan a keda incorpora como ministro, cu excepcion di RED. Mas sorpresa tabatin si den e composicion di e diferente ministerionan. Pa cuminsa ariba, e ministro presidente ta semper ministro di asunto general, pero banda di esaki ta haya tambe e carteranan di Integridad (nobo), Energia, Innovacion, y Organisacion Gubernamental. Hunto esaki ta un pakete sumamente pisa, sigur cu bista pa futuro, unda e restructuracion di e aparato gubernamental lo bay tuma hopi tempo y energia. Ademas e tarea pa introduci integridad den e sistema gubernamental, algo cu tabata casi desconoci te awor. No cu no tabatin algun intento pa yega na algo, manera durante e gabinete AVP/OLA di 1997 pa 2001, pero esey a keda na mero (bon) intencion. Tambe durante e gabinetenan di partido MEP (2001 – 2009) unda a haci un kerntakenanalyse, te ey a yega. Pero nos ta bibando otro epoca awor unda no tin tempo pa vacila. E bon di e escogencia pa pone tur esaki den man di e prome ministro ta cu e ta esun cu ta responsabel directamente y no mester warda si un otro colega ta moviendo of no.

Cu ministerio di Financia lo a bay pa Xiomara Ruiz Maduro tambe tabata di anticipa, pero e combinacion cu Asunto Economico y Cultura ta haci cu atrobe ta perde e oportunidad di pone henter economia den man di un solo ministro, por ehemplo di turismo. Awor atrobe, maneho di economia total ta den diferente man, loke no ta haci maneho integral imposibel, pero si mas dificil.

Combinacion di Asunto Social y Labor ta parce un escogencia logico, y ta trece pa di dos biaha den su carera, e persona concerni den posicion di ministro. Como ministro di Labor e lo mester indica na comunidad kico lo ta e precaucionnan cu e lo tuma pa preveni e situacion den cual e anterior ministro a haya su mes, na momento cu e como ministro mes tabata sobre pasa e decision di e funcionario cu tin mandato pa conseha encuanto mercado laboral, cu e ya famoso ontheffing cu no tin derecho di existencia. Diseña y cumpli cu un proceso transparente lo ta clave pa por tin confiansa den comunidad.

E ministro encarga cu Turismo, manera bisa anteriormente, por a combina e cartera aki cu Asunto Economico na luga di Deporte, mandando esaki hunto cu Cultura pa e ministerio di Financia, sigur pasobra no ta envolve dos diferente partido den e coalicion. E cartera di Transporte, Comunicacion y Sector Primario ta uno di composicion logico. E cartera di Infrastructura y Medio Ambiente a keda pa e tambe vice- ministro presidente, cu no ta responsabel mas pa Inmigracion. Ta bon cu e responsabilidad aki ta bolbe pa ministerio di Husticia. E vice- ministro presidente no ta haya un tarea facil pa bay maneha un ministerio cu tabata conta grandemente cu su critica pa e manera cu su predecesor tabata maneha esaki. Nada facil, pasobra Aruba no ta crece den tamaño y realmente mester tabata conta hopi aña caba cu un maneho estricto y transparente pa loke ta emision di tereno di propiedad publico y mester duna prioridad tambe na implementacion di ley di Ordenamento Teritorial.

RED ta mantene su opinion di un vak minister den sentido cu e ministro encarga no ta laga parlamento pa bira ministro, y tampoco ta e lider cu ta haci esey. Asina e partido ta mantene su persona fuerte den parlamento loke ta bon noticia: esun cu e votonan su tras ta sinta den parlamento pa controla ehecutivo. Ohala nos por a mira algo similar cerca e otro partidonan, unda atrobe e personanan estelar di e ekipo partidario ta bira ministro y ta laga e segundo nivel den parlamento pa controla nan…

Awor cu tin gobierno, naturalmente e famoso 100 dianan di beneficio di duda ta cuminsa… No cu nos ta bay ta asina estricto cu nos ta sinta conta dia, pero si ta nos tarea como prensa pa sigui e acontecimentonan gubernamental di cerca, sigur tambe pa e peso enorme cu e gabinete a tuma riba su mes. Manera nos prome ministro a anuncia caba, e asunto financiero ta e prome preocupacion cu no ta di e minister encarga cu Financia so, sino di e gabinete den su totalidad. Henter Aruba ta pendiente di e prome pasonan cu e gabinete ta bay haci. Tambe e partido grandi cu a keda den oposicion, cu lo mustra cu nan ta un contrincante agil y bon prepara. Pero nos no mester mira esey necesariamente como algo negativo: mescos den deporte, ta un contrincante duro so por impulsa bo pa presta miho ainda. Un di e deseonan cu nos lo por tin ainda ta un parlamento funcional cu ta trata e asuntonan al caso cu diligencia, sin e maniobranan conoci di pasado.

Finalmente, nos lo conoce un prome ministro femenino. Algo memorabel, pero cu pa e persona mes no ta haci tanto diferencia: su tarea ta mes duro cu pa cualkier otro. Pabien y forsa.