Mi hendenan, saludos! Akinan temperaturanan ta bahando, pero ken ta worry? Un djies ta ora di bay Aruba como ham dus e animo ta gewoon subiendo. Awo, ban haci tiki redo pasobra e siman ki si tin contexto. Manera Celia Cruz tabata bisa, Azuuuuuuuuuuucar!
No mucho tempo pasa, un di nos local heroes nan a bin cu e glorioso idea di digitalisa cultura di Aruba. Cu hopi entusiasmo mi a mira e homber aki cana tur su stapnan pa por logra cera un team cu tabata kere den e mision. Su obhetivo tabata simpel mi hendenan. Crea un database unda nos lo por haya tur locual tin di haber cu nos cu un solo click. Sea tabata articulonan cultural, cancionnan di mucha, potretnan documenta, etc. E ambicion tabata pa crea un plataforma digital unda tur hende por aporta na nos Cultura den un forma digital. Tambe, lo a uza e plataforma pa promove y sostene iniciativanan y artistanan local. Pero manera tur otro cos na Aruba cu tin balor cultural, social y no balor monetario. E proyecto no a conta cu subsidio di ningun organisacion. Na final di dia nos tur ta humano cu necesidadnan y gastonan, e ta duro pa sigui cu algo ora cu no tin un tiki apoyo financiero. Pasion no ta paga debe mi hendenan y esaki ta duro pa ami bisa, pero como artista mi mes ta sufri di traha por nada constantemente. Mi ta stima arte asina hopi, tur fin di luna kico mi ta? Feliz, pero tambe bashi y cansa dus ja.
E gobierno nobo ta yena nan boca bisando cu nan lo tene asuntonan social na curason.
y ami ta para warda. Mhm, Ricardo, Evelyn, mi bon amigo Otmar I see you! I am waiting.
Sinceramente, aparte di gobierno, mi ta egt spera nos hendenan mes tambe pone mas empenjo riba conta nan mesun storianan y documenta esakinan. Mi kier mira mas poemanan Arubiano, mas pelicula Arubiano, mas creacionnan di hendenan cu ta combarti cumi un cultura. Representacion ta asina importante mi hendenan. Boso no sa con hopi e kiermen pa un mucha por crece y tin su propio heroenan rond di dje. Pa e por sende television of google su isla y wak imagennan positivo di hendenan cu parce. Data ta sagrado den e temponan cu nos ta bibando aden. Boso no sa con e ta kibra mi curason cada biaha cu mi kier uza Aruba como base pa un proyecto di scol y e juffrouwnan ta bringa cumi pasobra “there’s no data, how are you going to do it?”
Ban digitalisa nos bidanan, digitalisa nos storianan, pa mayan nos yiunan y nos nietonan tin unda haya nan. Pa mayan nan no tin cu sinja ken nan ta den un otro idioma of den un otro contexto. Pasobra di berdad, tin tanto articulo Americano of Hulandes cu bo por lesa tocante un topico prome cu bo realisa nan no tin nada di haber cubo. Mi ta bolbe ripiti, e base na ta un humano sigur di su mes ta cuminsa na sa ken bo ta. Gobierno, instancianan, companianan cu placa. Por favor inverti mas den cultiva e talento y inteligencia di nos hendenan.
Aruba ta yena cu su mesun Oprah Winfrey’s y su Nelson Mandela’s. Lo unico cu nan ta wardando riba dje ta un poco sosten. Please stop di bira lomba na proyectonan cu tin tanto balor in the long run.
