Recientemente Gemeente Amsterdam a nombra 15 brug pa es motibo cu te ainda nan no tabata tin un nomber oficial. E heroe di resistencia esta e Arubiano Boy Ecury tambe lo ‘haya’ su brug. Esta brug 788 na Nieuw West.
Asina por a lesa riba amsterdam.nl. Bon Dia Aruba a tuma contacto cu e gemeente pa pregunta kico tabata e criterio pa nan a nombra un di e brugnan na sr. Ecury.
“E peticion pa nombra un di e brugnan Boy Ecury a wordo haci pa un ciudadano”, asina Floris Thoolen, coordinador di nombra luganan publico di Amsterdam ta splica. E ciudadano tambe a splica cu e bario na Amsterdam conoci di heroenan di resistencia durante guera mundial te awe nunca a nombra un caya, plasa of un brug na heroenan di resistencia di Antias Hulandes. Mientras e bario aki, yama Nieuw-West, ta uno multicultural, cu basta hendenan di Aruba, Corsou, Bonaire y islanan ariba, segun sr. Thoolen. Manera menciona na e bario aki lo nombra un di e brugnan Boy Ecury. E brug ‘Arubano’ ta conecta Romerostraat cu Pilatusstraat y ta bay over Anielewiczsingel.
Jorge Adelberto ’Boy’ Ecury, a nace dia 23 di april 1922. Despues di a caba scol aki na Aruba, el a muda pa Hulanda pa sigui su estudio na Hogere Handelschool na 1937. Durante e Segundo Guera Mundial, el a join e resistencia. Riba dia 5 di november 1944 el a wordo aresta na Rotterdam y un dia despues el a wordo fusila pa soldatnan Aleman na Waaldorpervlakte, na Scheveningen.
Na 1947 su restonan mortal a wordo treci pa Aruba. Na 1984 Boy Ecury a wordo honra e cruz di conmemoracion di resistencia.
