Asamblea Constituyente di Venezuela a autorisa un huicio contra Freddy Guevara, ken ta refugia na embahada di Chile na Caracas, despues cu Tribunal Supremo a pidi Asamblea Constituyente pa kita su inmunidad parlamentario. Proteccion parlamentario di Guevara tabata imposibilita pa cuminsa un huicio contra su persona, como miembro di Asamblea Nacional, e parlamento legitimamente elegi.
E Constituyente a dicidi pa autorisa un huicio contra Guevara, vice-presidente di parlamento cu awor ta di mayoria di oposicion, pa delito di yamado na violencia y asociacion pa comete delito.
E delito a tuma lugar supuestamente durante e protestanan contra Nicolas Maduro, cu a laga mas di 125 morto entre luna di april y juli di e aña aki.
Tribunal Supremo di Husticia (TSJ) di Venezuela a pidi Asamblea Constituyente pa kita e proteccion di Guevara, “y a verifica cu tin prueba suficiente contra Guevara,” por lesa den e documento.
E texto a ser aproba cu urgencia pa e organo cu ta dirigi Venezuela manera un super poder desde luna di augustus di e aña aki.
