Ministerio Publico ta informa Bon Dia Aruba cu te cu actualmente no tin ningun informacion nobo relaciona cu e asesinato di siman pasa di e hoben Sahari Sierra, di 19 aña. Diadomingo ultimo autopsia a tuma luga y despues di esaki a duna e curpa di e victima liber na e famia.
“No tabata tin ningun detencion ainda,” vocero di OM ta bisa Bon Dia. E caso di asesinato aki na cas di pueblo den De Vuyst, San Nicolas, ta un otro shock pa e comunidad di Aruba manera e di tres asesinato pa aña 2017. Nos a acudi na Ministerio Publico pa wak kico ta e ultimo desaroyonan cu tin y/of cu nan lo por divulga relaciona cu e investigacion aki cu a caba di inicia.
E autopsia a tuma luga diadomingo anto e curpa a wordo laga liber mesora pa famia cuminsa e proceso di entiero. Mester a bin cu un patologo di afo pa haci autopsia pasobra a considera e caso aki un poco diferente. “E patologo ta staciona na Corsou, pero e ta wordo comparti cu nos cu ta islanan ruman. E ta un experto top cu nos tin suerte di por haci uzo di dje,” vocero di OM ta bisa.
Tabata tin un pickup dobbel cabina cu a presenta na e sitio e dia di e asesinato, unda cu un confrontacion a start ora cu habitantenan y famia a bay den su direccion. Nos a puntra Ministerio Publico si e dicho personanan aki ta sospechoso y con a para cu nan. Ministerio Publico no a informa nos mucho mas riba esaki pero confirma cu e situacion particular aki no a hiba na detencion di ningun hende.
Di tres asesinato pa aña 2017
Di locual e noticia aki ta indica di ta, ta parce cu esaki lo ta e di tres caso di asesinato pa e aña aki. Alto comisario a bisa cu e investigacion ta andando actualmente y cu tin cierto indicacion caba ken e persona responsabel por ta. El a bisa cu na cualkier momento por pone man riba e sospechoso aki. Alabes e ta pidi si cual kier persona por tin informacion pa yama tiplijn 11147 y nan ta garantisa cu bo ta keda anonimo.
