Despues di critica fuerte, Puerto Rico ta spera di habri mayoria di scol awe

Departamento di Educacion di Puerto Rico ta spera di habri 80% di e 1.113 scol publico riba e isla awe, dialuna, despues di flexibilisa e normanan pa drecha e instalacionnan, pa motibo di presion di e mayornan y  e stuciantenan cu ta reclama pa bolbe na normalidad.

A traves di Twitter Departamento di Educacion a publica e lista di e scolnan cu lo habri.

E lentitud den e proceso di reanudacion di les na e scolnan riba e isla a ser critica pa mayor, maestro y hasta legisladornan cu ta keha cu despues di seis siman despues horcan Maria a pasa solamente 152 scol ta habri caba, loke ta apenas 13% di e totalidad, den e regionnan educativo di San Juan, Ponce, Mayagüez y Bayamón.

Grupo di mayor y maestronan a tene manifestacion di protesta dilanti di e scolnan cera durante henter siman y e Federacion di Maestro di Puerto Rico (FMPR) a convoca un manifestacion masal pa dia 9 di november, pa presiona pa e apertura di tur scol cera.

E comunidad escolar ta reclama cu hopi scol ta den condicion di opera, cu awa, sin escombro o daño cu ta representa peligro pa e alumnonan, pero cu no a habri.

Incluso un mama di un alumno di educacion special a inicia un huelga di hamber dilanti departamento di educacion na Hato Rey pa exigi cu ta reanuda les na e scol elemental urbano di Guaynabo pasobra e scol cera pa bastante tempo ta afectando salud di e mucha.

“E muchanan di educacion special, ora bo kita nan mundo di nan, ora bo kita nan scol di nan, bo kita nan terapia, bo ta laga nan desarma. Ta otro horcan cu ta bin pasa riba nan,” e mama, Jinette Morales, a bisa Univision.

E criticanan ta enfoca riba e retraso den e trabaonan di e Cuerpo di Ingeniero di Ehercito di Merca y un empresa cu a contrata pa inspeccion di e scolnan y pa certifica cu nan no ta representa peligro pa e alumnonan t cu nan tib servicio di awa, cu nan ta liber di escombro y nan ta fumiga.

Algun miembro di e comunidad escolar a bisa cu e bishitanan di e Cuerpo di Ingeniero na e scolnan tabata rutinario y cu den ningun caso a haci estudio tecnico den e edificionan, sino cu unicamente e ingenieronan ta limita nan mes na anota e informacion cu e maestronan ta duna nan.