Recientemente Lilian Semeleer, hefe suplente di Biblioteca Nacional, a ricibi un bunita obra for di dos miembro di Kiwanis Club of Aruba. E ta un produccion Kamishibai, di e escritora di buki pa mucha, Liliana Braamskamp-Erasmus, cu e titula: ‘Kico Kiwi Kier Awo?’. Esaki segun un relato cu nos a haya.
E obra tin cuater storia pa mucha y ta pa muchanan di scol preparatorio y basico di Aruba. Kamishibai ta un estilo di contamento di storia na un grupo di muchanan cu a origina na Hapon. Ora un maestro den klas kier conta un storia for di un buki di mucha (prentenboek), constantemente e tin dificultad cu e no por mustra e muchanan e pintura mientras cu e ta lesa e texto. Ora e maestro mustra e muchanan e pintura e no por lesa e texto, y ora e lesa e texto e no por mustra e muchanan e pintura.
Kamishibai ta split e pintura y e texto facilitando e contamento di storia na e muchanan. Riba un sheet di size A3 e pintura di e storia ta wordo imprimi pa dilanti mientras cu e texto corespondiente ta wordo imprimi patras di e sheet. Adicional ta haci uzo di un cashi di palo (un teatro) unda cu ta hinca e sheetnan aden pa facilita e cambio di sheet y tambe pa crea mas drama den e contamento di e storia. E resultado ta cu e grupo di mucha por wak e pintura dilanti hopi bon mientras cu e maestra por lesa e texto imprimi patras trankilamente.
E storia Kico Kiwi Kier Awo ta e di cuatro edicion di e proyecto di Kamishibai di Kiwanis Club of Aruba pa nos muchanan. Contamento di storia ta stimula e desaroyo di un mucha, principalmente muchanan chikito. Kiwanis club of Aruba ta haci e donacion aki di teatro di palo y storianan na scolnan na Aruba.
