Desde ayera tra’i merdia por a wak basta conmocion den comunidad di Aruba pa un caso cu ta mustra di ta un asesinato cu a tuma luga na De Vuyst. Ta trata di un mucha muhe di 19 aña di edad di inicial S.S.. Comentarionan tanto riba Facebook como tambe na e sitio ta cu no ta comprende kico por a pasa ya cu e persona aki ta un hoben ehemplar cu ta practica deporte, ta un studiante y ta mama di un yiu hunto cu su pareha.
Caso
Diabierna merdia ruman ta yega cas na De Vuyst y ta haya su ruman muhe den baño, pero e no ta reacciona. E tabatin saco na cabes y man cu pia mara cu waya. E ruman a sali na careda bay na cas di famia pa pidi yudansa.
Ora cu famia ta yega e cas, nan ta constata e situacion y ta bati alarma na polis. Patruyanan ta yega di biaha y a cera e area. Recherche hunto cu departamento forensico di cuerpo policial a presenta pa inicia investigacion. A cera e area pa ningun hende yega cerca.
Pa mas o menos 2or di atardi, dokter Giel ta constata morto di e hoben naci dia 10 di september 1988. Fiscal Erades a duna ordo pa confisca e curpa.
Bisiñanan ta lanta contra chauffeur
Pa mas atardi na e mesun un sitio a drenta melding cu lo tin un problema grandi y e prome informacion tabata bisa cu bisiñanan a lanta contra polis. A bin resulta despues cu mientras ainda autoridad tabata na e sitio ta atende e caso, ta yega un pickup dobbel cabina di cual e habitantenan y famia a bay di biaha den su direccion.
A inicia un problema grandi pa cual a manda diferente patruya pa atende cu e situacion. No ta conoci pa ki motibo e habitantenan lo a ataca e persona aki, di cual nomber ta circula ta wordo conoci manera un tal Kayman. E persona e momento ey a bira di interes pa autoridad, aparentemente pa loke e habitantenan na e sitio tabata papia contra di e persona. Polis a bay cune for di e sitio cu urgencia pa asina e wordo interoga. Tambe a tuma e pickup den beslag pa investigacion.
Periodista Juan Werleman cu tambe tabata na e sitio na momento cu esaki a tuma luga a conta locual cu e mes a experencia. “Na e sitio mi a mira con un grupo di mas o menos 20 homber y muhe a acerca e pickup y algun hende tabata purba di saca e dos ocupantenan cu menos bon intencion”.
Sr. Werleman ta sigui splica cu e por a mira con algun hende tabata purba aleha esunnan emocional for di e chauffeur. Segun e periodista, polisnan a interveni pa evita algo pio y a aleha esunnan presente un poco mas leu di e sitio. “Mi ta enfatisa cu niun hende a intenta den ningun forma algun pa agredi ningun miembro di KPA”, el a bisa.
Di tres asesinato pa aña 2017
Di locual e noticia aki ta indica di ta, ta parce cu esaki lo ta e di tres caso di asesinato pa e aña aki. Alto comisario a bisa cu e investigacion ta andando actualmente y cu tin cierto indicacion caba ken e persona responsabel por ta. El a bisa cu na cualkier momento por pone man riba e sospechoso aki. Alabes e ta pidi si cual kier persona por tin informacion pa yama tiplijn 11147 y nan ta garantisa cu bo ta keda anonimo.
Bon dia Aruba a tuma contacto cu Ministerio Publico pero ta pendiente ainda di un reaccion. E noticia aki ta keto bay den desaroyo y nos redaccion lo trece mas informacion di esaki ora e ta disponibel.
Investigacionnan lo mester determina kendenan ta responsabel pa e mucha muhe su morto.
