Siman pasa Ministerio Publico a haci un entrada hudicial na e oficina principal di Ennia na Corsou. Esaki den cuadro di un caso penal contra e presidente di e Banco Central di Corsou y St. Maarten (CBCS), esta Emsely Tromp. E desaroyonan aki tambe ta keda lanta preocupacion na Aruba.
Aunke e compania di seguro na Aruba ta un entidad apart y asina ta cay bou di Banco Central di Aruba. Sinembargo den pasado tabatin un caso cual finalmente a settle despues cu un manager a meld na Banco Central cu e compania di seguro no tabata mantene su mes na e reglanan.
Manera nos a publica aña pasa e comerciante y persona di influencia grandi esta Hushang Ansary, cual tin e mayoria di accionnan den e compania di seguro, a uza placa di e compania ilegal pa cubri inversionnan y gastonan den otro companianan. Esaki tabata pasando den e compania di Ennia na Corsou, segun un rapport secreto di Banco Central di Hulanda cu a lek den prensa.
Despues cu e noticia aki a sali, ex presidente di nos Banco Central Rob Henriquez a bisa cu ya den pasado el a adverti contra e cumpramento di e compania di seguro door di sr. Ansary. Pero cu finalmente e no a logra como cu ya Banco Central di Corsou (e tempo ey caba bou mando di Emsley Tromp) ya a aproba e benta aki. Sinembargo sr. Henriquez si a logra pa realisa cu Ennia a bira un compania apart na Aruba y asina ta cay bou supervision di Banco Central na Aruba. E Banco aki ya a avisa e compania di Ennia den pasado pa tene su mes na reglanan. Locual sr. Henriquez tambe a bisa den e entrevista tabata cu sr. Ansary tabatin hopi bon relacion cu e politica local y asina tambe den e Banco Central di Aruba.
Despues di e entrevista aki sr. Henriquez a wordo confronta cu hopi problema, hasta menasanan huridico como cu segun e acusadonan e no por a papia pa motibo di ‘bankgeheim’ cu ainda e ta mara na dje. Sinembargo sr. Henriquez tabata pensa cu e rapport di Banco Central di Hulanda, e informacion ya tabata publico caba. Tambe a ana aki Banco Central di Hulanda (DNB) a perde un caso cu Ennia a entama unda hues a dicta cu e Banco no por a mete den e operacion di e compania di seguro. Y asina no tabata autorisa como cu ta Banco Central di Corsou y St. Maarten tin e autorisacion. Sinembargo Banco Central di Hulanda tabata preocupa cu e situacion financiero di Ennia y tambe e conducta di sr. Ansary y e echo cu Banco Central di Corsou y St. Maarten no tabata actua.
Manera den caso penal contra presidente Tromp di e Banco Central di Corsou y St. Maarten ta mustra, e tin un bon relacion tambe cu sr. Ansary. Asina e Banco a nenga di actua riba varios avisonan di e transaccionnan dudoso di Ennia cual sr. Ansary tabata autorisa. Sr. Tromp entre otro ta acusa di corupcion y labamento di placa.
Ennia a publica su cifranan financiero despues di 2 aña sin cumpli directo cu reglanan di supervision di Banco Central pa publicacion di relato financiero. Den e rapport e accountant ta remarca tambe cu e compania di seguro no ta cumpli cu e reglanan di Banco Central di Corsou y St. Maarten. E reglanan a bira mas estricto. Ennia a hinca placa den activa cual segun e accountant no tabata mag y tampoco no a drecha esaki na tempo.
