Pa medio di un post riba pagina di Facebook 297sports, nos redaccion a compronde cu ciclista Rechenel Statie ta recuperando. Esaki ta e hoben cu un automobilista a dal algun siman atras na Seroe Colorado.

Manera conoci, e hoben Rechenel (17) mester a wordo transporta pa Colombia pa tratamento medico. Segun e post di 297sports, e hoben a cuminsa reconoce su hendenan mas cercano y ta comunica den forma leve. 297sports a sigui informa cu e situacion di e ciclista ta mehorando y mustrando progreso cada dia na Colombia.

“Un noticia cu sigur ta haci nos tur contento. Informacion cu nos a ricibi di bon fuente ta bisa cu e hoben Statie a cuminsa reconoce su famia y su compañeronan di ciclismo cual ta un señal super bon. E por hasta comunica pero den forma hopi leve cu tiki palabra. E ta hasta hari y pone su peace sign ora bo cumind’e, e post ta bisa. Pa awor dokternan lo prefera warda un poco mas pa opera e hoben Arubano. E presion di su cabes a baha y un scan recientemente haci a mustra un progreso. Statie a cuminsa cu terapia mirando e tempo largo cu e tin riba cama. E post a conclui cu: “Mirando e noticia aki sin duda ta haci nos tur contento. Richi ta un hoben balente y un fighter manera el a demostra desde su accidente. Mas despues nos lo trece un otro update di e hoben Rechenel Statie.”

Siguridad pa ciclista
Manera nos a publica algun dia pasa, algun persona den comunidad a entrega un carta na formado di gobierno pa asina vocifera nan preocupacion pa ciclistanan riba e isla. E grupo tin un propuesta pa bini cu un campaña di conscientisacion pa automobilista, y tambe un grupo di interes cu lo por pensa hunto pa soluciona problemanan cu ciclismo ta enfrenta riba nos isla. Annemarie Melchers di TriBike a laga sa cu e solucion lo mester bin di ambos banda. No djis pa automobilista cuminsa tene cuenta cu ciclista, pero pa ciclistanan tambe cuminsa tene cuenta cu cierto puntonan di atencion manera pa core cu luz y kico bo ta haci riba caminda ora bo ta un ciclista. Bond AWB a bin cu un manifiesto atrobe algun siman atras unda cu gran cantidad di ciclista a firma. Nan a entrega esaki na e gobierno demisionario y tene un corto reunion cu ministernan Arthur Dowers y Benny Sevinger riba e puntonan di atencion.

Area pa ciclista
Un punto di atencion cu a bini dilanti cual nos a publica riba dje tabata e area na Colony cu gobierno demisionario a priminti na ciclistanan pa nan practica nan deporte. Esaki ta algo cu segun sr. Sevinger por wordo regla masha lihe. E area menciona ta esun na Colony direccion di refineria unda por core un ronchi di 5km , cual hasta e coach nacional di ciclista na mesa a bisa cu ta un solucion hopi bon cu nan lo por biba cu ne.

Bon Dia a purba tuma contacto cu entre otro bond AWB pero no a logra ainda pa un reaccion. Nos lo keda pendiente pa mira con esaki lo desaroya pa e ciclistanan.