Santuario di burico tin mester di mas boluntario

Segun Desiree Eldering, Directora na Donkey Sanctuary Aruba, despues di casi 20 aña situa na Santa Lucia, a bira tempo pa move e 130 buriconan na un area mas grandi y mas atractivo. Sinembargo, aworaki tin falta di mas boluntario cu nunca pa motibo cu e buriconan na Aruba ta den cada dia mas peliger y ta exigi mas pa protege nan.  

Anton Isaak, consehero di directiva y boluntario pa 3 aña na Donkey Sanctuary Aruba,ta splica Bon Dia cu awor mas cu nunca tin un interes mas grandi pa salba nos buriconan. ‘’Tin trafico di mas, mas casnan cu ta wordo construi y hopi otro factornan cu ta trece nos buriconan na Aruba den peliger’’ , Isaak ta bisa

Sra. Desiree Eldering, tambe conoci como e ‘’Godmother of Donkeys’’,   ta e gerente na Donkey Sanctuary Aruba y ta haciendo esaki pa mas cu 18 aña caba. 2 aña pasa hopi fundacion a haya nan contract kibra door di gobierno pa motibo cu no tin placa pa subsidio mas y Donkey Sanctuary Aruba tambe a cay den e buraco aki. Aworaki Donkey Sanctuary Aruba ta completamente dependiente di ayudo boluntario.

Mantencion di burico no ta barata
‘’E ta  mas o menos 60 dollar pa luna pa  cuido di cada burico, pa locual ta cuminda y salud di e bestia. Semper nos a pidi ayudo di fondonan por ehempel manera Stichting DierenLot y Prins Bernhard Cultuurfonds, tambe Superfood y companianan priva ta yuda nos hopi pasobra e no ta un trabao facil pa nos haci’e riba nos mes’’ Sr.Isaak ta splica.

No ta cobra entrada pa drenta Donkey Sanctuary pa motibo cu nan mester keda den disposicion di e comunidad y tambe tin hende grandi cu tin burico y sa bin bishitanan cu nan famianan. Ora turista drenta tambe nan ta haya hopi agradabel cu no ta cobra pa entrada y segun sr. Isaak, nan no ta solamente laga atras mas tip, pero nan ta disfruta mas di dje y keda bin bek tur ora nan bishita Aruba.
Ta bay tin un tienda tambe cu diferente acesorionan manera habon di lechi di burico y hopi otro productonan cu tin di haber cu burico. Tambe ta bay tin un cafetaria chikito caminda bo por pasa cu bo famia y busca algo di come y bebe. Bo por cumpra un saco chikito di cuminda tambe pa duna e buriconan di come. Santuario di burico a muda bay Bringamosa na Santa Cruz cerca di Franse Pas anto e orario nobo lo ta for di 9or di mainta te cu 4or di atardi tur dia di siman.