Gerencia di Elmar y STA ta evaluando firma di protocol y documento riba reorganisacion

Despues  cu gerencia di e compania di utilidad Elmar N.V. a haci e presentacion na e trahadonan ariba e plan cu nan  tin di reorganisacion, mediador di gobierno a sinta cu e partidonan hunto, y awor nan ta reuniendo cu nan separa. Igualmente e departamento aki a redacta un protocol riba con e partido por traha hunto. 

Pero igualmente di parti di compania Elmar nan a bin cu un proposicion pa e sindicato STA  cu ta e sindicato nobo cu a drenta pa representa gran parti di e trahadonan cu ta cay bou contracto colectivo. Nan kier wak con nan por pone nan firma bou e documento aki cu ta encera reorganisacion y eventualmente reubicacion di trahadonan den e empresa aki. Ambos documento ta ariba mesa y e partidonan y nan respectivo abogadonan ta evaluando nan.

Dialuna awor mediador di gobierno, Anselmo Pontilius  a reuni un biaha mas cu gerencia di Elmar pa wak si nan por yega asina leu cu e partidonan ta firma e prome protocol, unda ta delinea con nan ta sigui traha cu otro. Mientras cu e documento cu ta encera e parti di reorganisacion di e compania Elmar, sindicato STA a yega di expresa cu nan mester mas tempo pa bay dor di dje. Segun sr. Pontilius, e tabata un punto cu e departamento aki a splica gerencia di Elmar dialuna ultimo.

El a laga sa cu actualmente nan ta spera di e contesta di e abogado di e sindicato.

E idea ta pa trece ambos partido hunto dialuna awor. Loke ta tumando luga aworaki ta un intercambio di carta entre e abogadonan riba e puntonan cu e sindicato ta indica cu nan por acepta y puntonan cu nan ta haya cu mester di un discusion. Unabes cu e cartanan aki drenta cu tur dos partido por lo menos tin un bista cla kico nan por biba cu ne y kico no, e  ora nan ta bay pa mira e puntonan di diferencia pa wak si nan por sali for di nan, asina Mediador di Gobierno a splica.

Sr. Pontilius ta spera di e partidonan por haya otro pa eventualmente firma un prome protocol. Despues lo atende cu e otro documento di Elmar cu ta uno mas grandi cu tin di haci cu henter reorganisacion di e compania .

E ta haya cu si logra cu e dos partinan aki por lo menos firma e protocol, lo tin mas entendimento y trankilidad, mientras cu tin ainda un CAO vigente. E punto importante ta cu e partidonan por determina por escrito con nan ta traha cu otro locual no mester ta un problema, segun mediador di gobierno.