Dialuna un muhe di Spaña a muri despues cu polis di Rio di Janeiro a tira riba un auto di turismo, mientras e tabata core den e conocido favela di Rocinha.
Segun prome investigacion, e chauffeur di e auto di turismo no a para na un control di seguridad di polis, despues di un tiroteo cu traficante di droga, polis militar a informa.
E muhe a keda herida y a ser hiba pa hospital Miguel Couto, pero no a logra salba su bida, polis a informa den un comunicado.
Un vocero di embahada di Spaña na Brasilia a bisa cu nan ta den comunicacion cu autoridad local, pa haya sa mas detaye, pero te ainda no por duna ningun declaracion.
E sucedido a tuma lugar ora cu e auto a core pasa den un blokeo di polis na un entrada di e favela di Rio di Janeiro, caminda un ora prome a tuma lugar un enfrentamento entre polis y narcotraficante, cu a laga dos polis y un delincuente herida.
Ora cu e auto a ignora e señal pa para, polis a reacciona cu tiro y despues “durante un inspeccion a haya sa cu e auto tabata auto di transporte di turista,” polis a splica.
Medionan di comunicacion di Brasil a identifica e muhe victima aki, y ta bisa cu e tabatin como 67 aña y cu e tabata biaha supuestamente cu un guia Italiano y otro dos persona di Spaña.
Favela di Rocinha, cerca di parti sur di Rio di Janeiro, tin varios siman den confrontacion, cu candela crusa entre cuerponan uniforma y narcotraficante. Awor tur operativo a ser reforsa cu mas di mil militar cu a yega na e lugar fin di luna di september.
Sin embargo, e asina yama ‘safarinan’ cu turista na e zona iconico y peligroso aki no a para.
