Santa Cruz: Aruba Volleyball Association a organisa durante e weekend cu a pasa un Apertura special di su Campeonato Nacional di Volleyball pa 2017, cual e aña aki a wordo dedica na Sra. Selma “Cheddy” Lopez Henriquez – Orman. Sra. Cheddy Lopez Henriquez of manera tur hende ta yame “Juffrouw Cheddy” no ta un persona desconoci den e mundo di volleyball aki na Aruba.
For di comienzo di su carrera como Maestra di Scol y alaves como Atleta di Volleyball, Juffrouw Cheddy a dedica mas di 60 aña na volleyball en general y ainda awendia na un edad avansa (80 aña) Juffrouw Cheddy ta activo ariba cancha di volleyball. Juffrouw Cheddy semper a dedica su mes na desaroya y entrena hobennan pa e deporte di volleyball den tur aspecto. Juffrouw Cheddy a competi na Weganan Escolar, na Weganan Interinsular y despues ta sigi cu e hobennan (mucha muher y mucha homber) pa competencianan di volleyball den e Campeonato Nacional di Volleyball pa Hubenil bao di e Organisacion S.V. Britannia. Te cu e dia di awe Juffrouw Cheddy tin teamnan competetivo den e campeonato nacional di volleyball di Aruba Teamnan di Volleyball S.V. Britannia cu actualmente ta den Campeonato Nacional.
Aruba Volleyball Association a honra Sra. Selma “Cheddy” Lopez Henriquez – Orman y a dedica e Campeonato Nacional di Volleyball 2017 na su-persona y ariba e anochi di apertura Presidente di Aruba Volleyball Association Sra. Filomena Daniel-Curiel a haci entrega di un bunita Reconocimento na Sra. Lopez Henriquez – Orman como un muestra di aprecio y gratitud pa tur e añanan di trabao cu Juffrouw Cheddy a dedica cu amor y pasion na e deporte di volleyball di Aruba.
Banda di e entrenamento di e hobennan, Juffrouw Cheddy a sirbi añanan largo como Miembro di Directiva di Aruba Volleyball Association y muy particular ariba e posicion di Secretaria di e Organisacion di A.V.A. y tambe pa e Directiva di Aruba Sport Unie. Apesar di a carga diferente responsabilidadnan Juffrouw Cheddy nunca no a stop di sigi practica e deporte cu semper ela stima, esta hunga volleyball. Sra. Cheddy a forma parti di e Seleccionnan Femenino di Volleyball di Antyas y di Aruba y nan a yega di competi na varios competencianan internacional. Ultimo añanan Juffrouw Cheddy a inicia un otro etapa den su carrera di volleyball y a bay forma parti di e Team di Damasnan Clasico di Volleybal di CBN Flyers.
Den cuadro di e dedicacion di e Campeonato Nacional di Volleyball pa 2017 na Sra. Cheddy Lopez Henriquez, Directiva di Aruba Volleyball Association a inicia e actual campeonato cu un Wega Special entre e Damasnan Clasico den cual Sra. Cheddy tambe ta forma parti. Na final di e Wega aki entre Flyers I y Flyers II, cada hungador a ricibi un reconocimento special di parti di Aruba Volleyball Association como un muestra di gratitud pa tur e añanan cu nan a dedica na volleyball di Aruba.
Sra. Carmen Frans – Figaroa a hiba palabra den nomber di CBN Flyers y a relata en corto nan experiencianan y ocasionan special (anecdotanan) cu Sra. Cheddy Lopez Henriquez – Orman.
