Dos alcalde Mexicano a ser ataca na estado di Colima, oeste, y na estado Michoacan. Segun informacion di corant ElPais, Crispín Gutiérrez, prome autoridad di municipio di Ixtlahuacán, a ser asesina ora cu e tabata coriendo riba un autopista.
Di otro banda, José Misael González, alcalde di Coalcomán ta stabiel despues di un tiroteo unda un di su escoltanan a keda herida y a ser hiba na hospital di Morelia, capital di estado.
Gutierrez ta e di tres alcalde asesina den luna di october na Mexico, gobierno regional a informa.
Fiscalia di Morelia a confirma den un comunicado cu Gutierrez tabata riba autopista Manzanillo-Guadalajara” ora cu el a ser ataca. E comunicado ta bisa cu polis di estado a pone un operativo en marcha, pa busca esnan cu a tira riba e alcalde.
E alcalde cu a muri ta di e partido den gobierno PRI y tabata goberna e localidad di Ixtlahuacán, cu 4.700 habitante, desde aña 2015. Gutierrez tabata un diputado di Congreso di Colima tambe, prome di keda elegi como alcalde. Colima ta goberna pa José Ignacio Peralta.
Diabierna cu a pasa, e alcalde di Coalcomán, na 150 kilometer di Ixtlahuacán a ser ataca cu arma di candela, pa un grupo cu tabata wardando pe, banda di e santana di e municipio aki, ora cu e tabata yega na un empresa di su propiedad.
González ta miembro di partido di izquierda PRD y el a cambia su posicion di lider di grupo di civil arma, crea pa lucha contra crimen organisa y asina combati crimen di cartel di Los Caballeros Templarios, pa presidente municipal na Coalcomán.
Gutierrez y otro dos alcalde mas a keda asesina e luna aki na Mexico: Stalin Sanchez, alcalde di Paracho, na Michoacán, un di e estadonan cu mas violencia relaciona cu crimen organisa, y alcalde di Huitzilan de Serdán, na estado di Puebla, Manuel Hernández, cu a ser asesina hunto su escolta riba caminda.
Desde 2003 mas di 50 alcalde a ser asesina na Mexico, segun asociacion nacional di alcalde.
