Diabierna ultimo Universidad di Aruba a tene un anochi informativo cu charlanan pa esunnan cu interes of curiosidad pa loke ta trata e diferente estudionan ofreci pa e universidad. Studiantenan a comenta cu nan a scoge pa Universidad di Aruba pa motibo cu cierto estudionan ta na mesun nivel cu Hulanda, mientras e prijs ta mas faborabel compara cu scolnan den exterior.
Durante e anochi e universidad su facultadnan: Faculty of Hospitality and Tourism Management Studies, Faculty for Accounting, Finance & Marketing, Faculty of Arts & Science y Faculty of Law a duna presentacionnan riba kico nan lo por ofrece studiantenan cu tin pensa di studia na nivel universitario na Aruba mes.
Joel Recappe, kende ta studiando Organisation, Governance & Management na e Faculty of Arts & Science a conta Bon Dia cu el a dicidi di cuminsa cu un estudio na Aruba pasobra ‘mi no tabata cla pa bay afo’. Sinembargo sr. Recappe a haya un estudio cu tabata zona perfecto pe akinan mes.
E ambiente na universidad segun sr. Recappe ta hopi bon, mirando cu e klasnan ta basta chikito. Asina semper e docentenan ta envolvi cu e studiantenan y tin contacto regular entre studiante y docente. Tambe e lesnan ta hopi interactivo, ‘y bo no ta sinti manera bo ta djis tumando loke nan ta duna bo, si no tambe ta envolvi den e proceso di enseñansa’.
Sr. Recappe a recomenda pa studiantenan y hobennan cu no ta mucho sigur kico nan lo kier studia den futuro pa acudi na un programa special di e Universidad, esta e Academic Foundation Year. “Si bo no sa kico bo lo kier studia ainda, e programa lo yuda bo pa orienta bo mes kico lo ta e miho opcionnan basa riba bo capacidad”.
Nos lo elabora mas riba e contenido y reaccionnan di publico di e charlanan duna pa e facultadnan den un proximo edicion.
