Dialuna ultimo, Bon Dia Aruba a publica un articulo riba pagina A3 bou e titulo: ‘RBC ta bay elimina cuentanan di Venezolanonan no residencia’. Ora e matutino a acerca e banco pa busca mas informacion, nos a ricibi e siguiente reaccion for di Manager of Corporate Communications, Southern Caribbean di RBC Bank, Hanneke Stomp-Harmsen, cu ta bisa textualmente asina:

Reaccion di RBC pa Bon Dia tocante: Ceramento di cuentanan di RBC na Aruba

E reportahe, RBC ta bay elimina cuentanan di Venezolanonan no residencia, cu a wordo publica riba 16 di october 2017 den Bon Dia ta inclui varios echo incorecto y speculacionnan tocante RBC su maneho di empresa y relacionnan cu cliente. Cu placer, RBC ta haci uzo di e oportunidad di corigi e echo incorecto aki.

Como parti di nos maneho di empresa usual, RBC ta haci un evaluacion periodicamente di e productonan y servicionan cu nos ta ofrece cliente pa sigura cu nos ta opera dentro di e parameternan apropia y aplicabel pa nos. E evaluacionnan ta wordo haci cuidadosamente y ta tene cuenta cu varios factornan y consideracionnan.

RBC ta envolvi cliente den e evaluacion pa medio di corespondencia personal y/o combersacionnan continuo. Cliente ta ricibi dato di contacto pa nan por haci preguntanan, duna informacion adicional o expresa nan preocupacion. Den algun circunstancia, despues di nos evaluacion, tin caso caminda nos no por ofrece servicio di banco na cierto cliente mas.

RBC ta balora su cliente: Nan ta den vanguardia den tur cos cu nos ta haci. E decisionnan ta wordo tuma basa riba cada caso individual y no ta wordo tuma levemente. Nan ta wordo haci solamente despues di un evaluacion extenso. Nos ta comunica nos decisionnan cu cliente, pero e resultadonan di evaluacionnan interno ta keda confidencial.

En caso cu e relacion entre e cliente cu RBC lo wordo termina, RBC ta traha hunto cu cliente durante e periodo di transicion, dunando nan suficiente tempo pa busca solucionnan alternativo.

Te akinan e reaccion textual cu RBC Bank a manda.

Mas clarificacion

Den cuadro di trece miho clarificacion y informacion rond di e articulo cu nos matutino a publica, nos a pidi e ehecutivo di e banco, sra. Stomp-Harmsen, pa aclaria si ta corecto cu RBC Bank lo tuma e decision aki di cera  e cuentanan di e Venezolanonan no residencia na Aruba. Igualmente cu lo ta bon pa banco informa cual ta e motibo di e medida aki. Ya cu e reaccion oficial di RBC cu nos ta publica awe textualmente ariba, no ta menciona esaki.

Ademas nos a puntr’e si mirando cu ta trata di un caso general,  kiermen di e Venezolanonan no residencia na Aruba,  y no di un caso particular di un cliente, ta bon pa informa nos comunidad cual ta e motibo tras di e decision aki. E tin di haber cu regla interno di e banco? Of di Banco Central di Aruba? Of e tin di haber cu e medidanan reciente  cu gobierno Mericano a tuma en cuanto e trafico financiero cu Venezuela?

E redactor di Bon Dia Aruba a haya for di sra. Stomp-Harmsen como contesta lo siguiente:

“Manera nos a indica den nos reaccion prome, e ta parti di nos maneho di empresa usual di evalua periodicamente nos productonan y servicionan cu nos ta ofrece cliente pa sigura cu nos ta opera denter di e parameternan apropia y aplicabel pa nos. E evaluacionnan aki ta wordo haci cautelosamente y cu gran esmero y ta tene cuenta cu varios factornan y consideracionnan.”

Sinembargo un biaha mas e punto cardinal relaciona si RBC Bank lo tuma e decision di cera  e cuentanan di e Venezolanonan no residencia na Aruba, no a wordo confirma ni nenga claramente pa Manager, Corporate Communications, Southern Caribbean di RBC Bank, sra. Stomp-Harmsen. Esaki a pesar cu nos matutino a insisti pa trece mas claridad riba a punto aki pa evita mal interpretacion of mal informacion.

Locual nos a haya como contesta for di sra. Stomp-Harmsen tabata: “Nos a duna nos declaracion oficial cu ta papia tocante e echonan. Lo ta resulta den un malinterpretacion intencional pa añadi cualificacionnan adicional na declaracion di banco.”