Soul Beach Music Festival ta awor mas cu un concierto

Den un conferencia di prensa Diaranson atardi, productor general di Soul Beach Music Festival Mark Adkins, hunto cu Mark Benson di Aruba Tourism Authority (ATA) a cubri e detayenan nobo pa locual ta e di 16 edicion di Soul Beach Music Festival na Aruba.

Su Excelencia Minister di Turismo, Otmar Oduber tambe tabata presente un rato y a elabora un poco riba e lansamento di e conscientisacion local pa locual ta Soul Beach Music Festival. Alrededor di 20 aña atras a cuminsa cu e proyecto aki cu awor a desaroya y bira locual e ta awe. Segun Minister Oduber, e maneho y e vision cu tin pa cu turismo ta uno di yuda pusha e lunanan di mei, juni y hopi biaha september y cuminsamento di October cu normalmente tabata conoci manera ‘Low Season’.

”Ta spera e aña aki entre 4,400 cu 4,600 persona cu lo bin for di e mercado Americano specificamente. Soul Beach ta keda importante pa Aruba pa motibo cu e ta un evento sumamente popular pa nos destinacion, pero tambe den e strategia di ATA pa e hecho cu e ta captura partinan di America cu normalmente nos no tabata pone mucho enfasis riba dje”, Minister Oduber ta splica.

E concentracion ta bay un tiki mas den e parti oost di America cual ta e sectornan principal segun Minister Oduber cu un 80/85% di esnan cu ta bishita nos isla ta bini for di e area aki.

 ”Esaki ta hopi importante pasobra e ta trece un balor adicional riba nos isla y tambe bishitantenan cu porta no tabata custumbra of a pensa di bira un di e mercadonan principal di bin Aruba, pero pa tin e presencia di e mercadonan aki ta complementa loke ATA ta haciendo awendia pa diversifica dentro di America mes y den e otro areanan cu nos falta pone mas atencion”
 

Aruba ”Meet Ups” 
Na varios parti rond di America tin hopi hende cu ta trahando eventonan pa topa cu hende cu tambe ta bay of a yega di bishita Aruba. Esaki ta hendenan cu a haci Aruba nan di dos hogar segun Mark Adkins cu ta splica cu si bo subi internet bo por mira diferente hashtags manera #TeamAruba  y #ArubaFamily. Esaki ta unificando diferente hende for di diferente parti di America cu ta encanta bishita Aruba y trahando un tipo di famia Americano cu ta bini Aruba tur aña y keda den contacto cu otro ora cu nan ta na America pa nan tur bini hunto. Segun Sr. Adkins ta sigui splica, e evento aki a bira mas cu un concierto awo pa motibo cu e ta treciendo diferente hende hunto y yudando expande e popularidad di Aruba.

E aña aki tin atrobe un lista di artistanan grandi cu ta bay bin Aruba y esaki semper a yuda pa locual ta atraccion turistico. Sr. Adkins ta invita pueblo di Aruba pa bin mira e comediante Tony Rock kende ta e ruman chikito di e famoso actor y comediante Chris Rock, y ta agrega cu tin algo pa tur edad por disfruta. Artistanan legendario manera The Isley Brothers tambe ta bay ta presente hunto cu caranan nobo den e mundo di musica cu ta internacionalmente grandi manera Fantasia y Miguel. Pa mas informacion por bishita www.soulbeach.com.