Director di APA (Aruba Ports Authority), Jossy Figaroa ta splica na Bon Dia Aruba cu e presentacion haci pa Lex de Ridder, Chief Commercial Officer di APA, tocante e Master Plan ta mustra kico lo bay bira e desaroyo nobo riba e tereno di waf na Oranjestad. Sinembargo e ta nota cu e plan no ta aproba ainda.
E presentacion aki a tuma luga den cuadro di Cruise Symposium Aruba organisa pa Oficina di Turismo Aruba (ATA).
Sr. Figaroa a laga sa cu nan tin basta tempo cu a traha riba dje. Pero e no ta aproba ainda y p’esey el a haya importante di por a haci e presentacion aki di e Master Plan durante e simposio pa asina nan por haya mas feedback.
Ta trata segun e presentacion aki- di un area di 20 hectar di tereno, di cual ta propone pa 40% ta destina como parke y areanan berde, 10% ta espacio publico pa cana, sinta y move y 50% lo ta propiedad pa diferente uzo.
Tereno di waf di container
Ta trata e tereno cu antes tabata e waf di container cu nan kier desaroya. E ta bay tin edificionan, pero e parti importante ta e parke, segun director di APA. El a referi na e parti cu sr. De Ridder a trece dilanti cu e area aki mester bira un parti integral cu locual ta sosode na Playa.
“E mester complementa locual tin den e centro di nos Playa. Teniendo cuenta cu loke nos local kier y turista kier.”
Director di APA a laga sa cu loke nan kier ta trece un ambiente unda cu turistanan pa bin cana riba waf hunto cu nos hendenan local y combersa cu otro. Loke nan ta sinti ta cu dia pa dia mas e turistanan kier tuma contacto cu e hendenan local. “Kiermen e cosnan ta cambia y nos mester dirigi nos mes riba locual nan ta gusta.”
Reaccion
Bon Dia Aruba a trece dilanti cerca director di APA e solicitud di un ex empleado y pensionado di APA, Jacobo Gavidia, caminda el a expresa su preocupacion pa no desaroya net e area pabou di waf di container. Sr. Gavidia ta haya cu e area net pabou di e waf di container mester wordo conserva totalmente pa gobierno. Den futuro ora cu nos kier expande nos waf pa haya mas barco di turismo, lo tin espacio pa expande y bay te Bushiri.
Sinembargo sr. Figaroa ta bisa cu den futuro nan ta purba pa amplia mas e waf na Barcadera. E no ta algo cu ta bira di biaha asina, pero esey ta e plan cu nan tin. Na Playa nan ta bay rek e waf un poco pero no mucho mas. Pues e ta kere cu si nos ta bay rek mas e waf na Playa, nos no por carga 6 pa 7 banco den mesun dia.
5 barco crucero den nos waf
Director di APA ta indica tambe cu riba 18 di october riba un solo di nos lo bay tin 5 barco riba waf y tur kier drenta riba e mesun momento entre 6:30 y 7:30 di mainta. Pa alrededor 8or di mainta mas cu 10 mil turista lo ta bahando den e mesun momento ey na waf. “Nos tin cu maneha di un manera of otro cu tur hende por sinti nan mes confortabel.”
E ta haya cu nos mester tin cuidao pa no tene hopi turista riba e mesun dia den waf, ya cu e ta crea cierto congestion den e area aki di Playa. Otro aña 2018 ta spera mas cu 800 mil turista crucero na Aruba, specialmente den high season. Pues lo bay tin dia cu lo bay tin cinco barco na waf.
Director di APA no ta haya cu ta bon tanto turista hinca den otro, particularmente e turista Europeo no ta gusta pa nan hinca cu demasiado turista riba waf. Esaki lo bira un reto pa APA y tur partner den turismo envolvi. Con nan lo bay maneha e volumen grandi di turista crucero pa tur hende sinti nan mes confortabel den nos waf.
