Diamars mainta tabatin un accion di e trahadonan di Stichting voor Verstandelijk Gehandicapten Aruba (SVGA), dilanti di e sede di Pasadia Briyo di Solo y Centro Man na Obra. E accion aki a conta cu presencia di presidente di FTA, sr. Hubert Dirksz kende ta representa alrededor di 40 trahadonan di e fundacion aki.
E sindicalista a bisa cu esaki tabata un accion di protesta di dos ora pa pone presion riba e directiva di e fundacion aki y si den caso nan no ta cumpli cu e contracto colectivo (CAO), FTA lo evalua si lo entabla un caso den corte.
Gratificacion di hubileo
Sindicalista Dirksz a declara na Bon Dia Aruba cu nan a constata cu e fundacion no por cumpli cabalmente cu e CAO, specificamente riba e punto di e gratificacion ora cu e trahadonan ta cumpli 25 of 30 aña di servicio. Nan lo mester ricibi un suma na momento cu nan ta cumpli e cantidad di aña aki. E ta un derecho cu e trahadonan a adkiri y pa añanan tin biaha cu dificultad, pero e directiva di e fundacion a cumpli cun’e.
“Pero aworaki nan no ta cumpliendo y e trahadonan ta haya esaki incorecto. Si bo a cumpli tur tempo dicon aworaki bo no por cumpli?”, sindicalista Dirksz a puntra. E echo aki ta haci –segun e sindicalista- cu e trahadonan despues di basta discusion cu gerencia y tambe cu gobierno no por a yega na un entendimento. P’esey e trahadonan a dicidi di bay den protesta ya cu si tin un CAO ta supone cu e directiva di e fundacion tin cu cumpli cun’e.
E ta un CAO vigente te cu luna di december 2016. Mayoria di biaha nan ta negosha un CAO pa tres aña, y e ta spera cu e proximo CAO no lo bira un excepcion. “Si e compania cumpli cun’e nos no tin problema, pero si abo no ta cumpli bo ta haya problema. Ademas cu e ta un violacion di un CAO, bo ta trece un conflicto…”, el a declara.
No cumplimento
Loke FTA no ta compronde ta cu di un banda e directiva d e fundacion ta bisa cu no a ricibi placa di gobierno, mientras cu gobierno di su banda ta bisa cu nan a manda e placa pa e directiva di SVGA cumpli cu e trahadonan. Pero sr. Dirksz ta haya lamentabel cu esaki no ta e caso, ya cu un grupo di alrededor di 10 trahado no a wordo honra ainda cu nan gratificacion di hubileo. El a bisa cu nan no ta papiando di hopi placa. Ademas FTA a bisa cu nan ta papiando cu di algo cu di antemano directiva di e fundacion sa cu tin cu percura pa tin e placa pa cumpli cun’e. “E trahadonan no por tolera esaki”, el a bisa.
Lider di FTA a indica cu a pesar cu e trahadonan a bay den accion pa un par di ora, loke si nan a tene cuenta ta cu e clientenan cu ta muchanan special y hendenan cu limitacionnan. Segun sr. Dirksz, nan a percura pa e busnan cu ta busca e clientenan no sali, pasobra e ta iresponsabel pa e busnan bay busca nan, mientras cu e trahadonan no ta trahando. Pa 10’or di mainta nan tabatin plania pa e accion termina y pa tur hende reanuda nan trabou.
Lesa tambe cu e director no tabata contento cu e accion.
