Cu e meta pa combati gasolin di contrabanda cu ta drenta nos isla for di Venezuela, gobierno di Aruba a introduci un prohibicion di importacion cu ya a drenta na vigor desde 6 di october oficialmente.
Desde hopi tempo caba autoridadnan tin problema pa frena e fenomeno di benta di gasolin barata for di Venezuela. Segun ta wordo comenta den comunidad, e ta un secreto publico cu diariamente tin botonan ta sali cu tanki bashi for di Aruba y ta bin bek carga cu gasolin for di Venezuela, unda cu aki e gasolin ta wordo saca bek for di e (extra) tanki di e boto.
Tambe sa tin botonan cu ta drenta cu e gasolin den barinan di 55 galon, ta transporta y warda esaki na un manera peligroso. Tambe algun tempo atras tabata tin un caso unda cu un grupo di persona a keda basta dia perdi riba lama despues cu boto a sali sin casi nada di gasolin rumbo Venezuela pa bay yena. E prijs di gasolin na Venezuela ta practicamente nada, na unda por yena un tanki di auto pa menos cu un dollar.
For di algun luna caba e grupo di enfoke encabesa pa e minister demisionario di Asuntonan Economico y Comunicacion Richard Arends, a reuni cu diferente instancia pa frena e contrabanda di gasolin cu ta bin di Venezuela y ta wordo rebendi aki na Aruba di manera ilegal, segun un comunicado di gobierno.
Como cu den e comercialisacion clandestino aki ta consisti di un acumulacion di delitonan, a envolve tambe Ministerio Publico y KPA.”Prohibi importacion di gasolin procedente di Venezuela, cu excepcion di bulk, ta e prome di e decisionnan concreto pa loke ta trata combatimento di e comercialisacion clandestino aki,” sr. Arends a declara.
E comunicado di gobierno ta splica cu no solamente esaki ta forma un competencia inhusto, pero e ta un peliger enorme pa trahadonan di waf, pa esunnan cu ta riba caminda, como tambe pa e habitantenan den e area unda e actividadnan aki ta tuma luga. E proceso di importacion ta inicia den nos awanan teritorial te yega den districtonan riba nos isla. E mandatario a splica cu Ministerio di Asuntonan Economico no tin e tarea ni autoridad pa persigui ningun persona, pero nos tin e deber di alerta e instancianan concerni pa haci esaki. P’esey a amplia e grupo di enfoke cu participacion di Ministerio Publico, Kustwacht y KPA pa asina por entama e pasonan hudicial necesario y penalisa e delitonan cometi.
‘E comercialisacion clandestino aki ta consisti di actividadnan unda cu no ta paga accijnzen, no ta cumpli cu regulacionnan di DTI, no ta cumpli cu leynan di vestigingsvergunning, no ta paga belasting, no ta cumpli cu e rekisitonan di brandweer.’
“Ministerio Publico ta na turno awor,” sr. Arends a bisa.”Nos ta trahando duro pa combati esaki y mi ta kere cu pronto ta bay tin accionnan di parti di departamentonan hudicial.” E mandatario a haci un bes mas un yamada na comunidad pa no participa den e practicanan aki. No solamente bo ta pone bo bida na peliger, pero tambe di otronan, e comunicado ta finalisa bisando.
