Ayera te ultimo momento esfuerso grandi a wordo haci di parti di oficina di Mediador di Gobierno, pero tambe di e partidonan envolvi, gerencia di RBC Bank y sindicato FTA, pa trece un solucion na e welga cu pa tres dia consecutivo ta tuma luga den e entidad bancario aki. Consecuentemente ambos partido a yega na un acuerdo cu den principio ta facilita pa e trahadonan por reanuda trabou awe mainta.
Ta asina cu a keda redacta un documento of protocol pa busca un salida na e situacion aki. E documento aki a wordo modifica te ora cu ambos partido a bay di acuerdo cu su contenido ayera nochi. Te ultimo momento nan por a supera e parti di nan diferencia.
Unabes cu ambos partido, gerencia di RBC Bank y FTA, por a logra supera e situacion aki, eventualmente e trahadonan ta reanuda nan trabou awe mainta. Sinembargo prome den ora di mainta tempran, FTA mester por logra convence su miembronan riba loke ta poni den e documento aki.
Tur e proceso pa yega finalmente na e acuerdo aki a cuminsa ayera for di ora di mainta. Ambos partido a bolbe reuni despues cu diaranson bou iniciativa di e departamento di Mediador di Gobierno a tuma luga e prome reunion entre gerencia di e banco y sindicato FTA.
Departamento di Mediador di Gobierno a intermedia den e impasse laboral aki, mirando e distancia cu tabatin entre e dos partidonan. E abogadonan di ambos partido a keda debati fuerte riba aspectonan legal den cual dificilmente departamento di Mediador di Gobierno por resolve e parti di interpretacion legal. Den e prome reunion no a logra concretisa nada y e dos partidonan a bay delibera internamente cu nan hendenan.
Ayera nan a bolbe reuni for di ora di mainta te cu merdia y nan a avansa bastante, y finalmente a logra un documento cu eventualmente ta wordo firma entre e representantenan di ambos partido awe prome cu merdia. Bon Dia Aruba no tin mucho detaye riba e contenido di e acuerdo aki.
