Deadline pago nummerplaat ta 31 di janurari

Segun Meverly Romano, vocero di Servicio di Impuesto (SIA), e departamento a haya complicacion den regla e financiamento pa e proyecto di digitalisacion di sistema di impuesto. Sinembargo e departamento ta den rumbo pa posiblemente completa esaki pa otro aña. Tambe e departamento a clarifica cu lo sigui uza nummerplaat di 2015 y sticker te cu 2019.

Manera nos a yega di reporta caba, director di SIA a declara den pasado cu e departamento lo implementa un sistema digital. Segun sra. Romano, e proyecto aki a haya poco complicacion pa regla financiamento durante aña. Pero e lo wordo implementa posiblemente den curso di 2018.

E sistema nobo aki lo trece sigur hopi cambio den e departamento internamente, pero no por laga di menciona cu esaki lo nifica hopi pa cliente tambe. E cliente lo por haci nan declaracionnan online, segun sra. Romano. Tambe hopi di e corespondencia cu lo tuma luga entre e departamento y su clientenan lo bay via e-mail.

Esaki lo por ta un posibel solucion pa e problemanan cu e departamento y clientenan ta enfrenta cu uzo di sistema di post. Manera nos a yega di reporta caba, e departamento ta haya dificultad pa traha cu sistema di post pasobra mester duna post nan tempo pa procesa e miles di cartanan cu ta sali for di SIA.

Cu e sistema aki ta bin consecuencianan serio pa e derechonan di ciudadanonan ora mester entrega un keho oficial pa bay en contra di un decision cu e departamento tuma. Esaki ta pasobra ley di impuesto ta prescribi cierto terminonan cu mester cumpli cu ne pa por considera un apelacion valido.

“Cu esey mi ta kere cu nos lo por dal un stap grandi pa modernisacion. Tambe e lo ta posibel pa e cliente haya ma informacion detaya mas lihe cu den e sistema actual”.

Nummerplaat di 2018 y 2019

Segun sra. Romano e intencion tabata pa introduci plachinan duradero pa 2018, pero esaki no lo bay door pa 2018 si no posiblemente den 2019. Pues e departamento lo sigui uza e nummerplaat blauw di 2015 y e sistema di sticker, manera ta e situacion pa e ultimo 2 aña.

Tambe sra. Romano a papia riba e tema di pago di belasting pa nummerplaat aña pasa. Cu cambio di ley esaki a laga hopi hende den situacion fastioso pasobra no a conta cu no lo tabata posibel mas pa paga plachi di tipo A den kwartaal. E cambio tambe a nifica cu pa plachinan di entre otro truck, taxi y bus mester wordo paga den un solo pago.

E departamento a haya hopi critica pa esaki, aunke cu segun sra. Romano e departamento a tene un maneho basta relaha. Pero pa loke ta trata pago di nummerplaat den 2018 sra. Romano a enfatisa cu mester tene cuenta bon cu e terminonan cu ta wordo duna. E deadline pa paga esaki den 2018 ta 31 di janurari.