Lo facilita tur calculo necesario pa gobierno nobo

Director di Banco di Seguro Social (SVb), Edwin Jacobs a bisa cu den e fase inicial di consulta pa e formacion di e gobierno nobo, nan a presenta un nota na Gobernador di Aruba cu un analisis di e factornan global di e fondonan di bienestar social cu nan ta administra.

Segun Sr. Jacobs parti di nan trabou den SVb ta pa monitor tanto local como na nivel internacional e desaroyonan cu por afecta nos sistema di siguridad social. Tambe nan a tuma nota di e diferente pensamento politico cu tin pa asina evalua cada un di nan.

Actualmente den e proceso no solamente di formacion di gobierno pero di informacion cu ta cuminsa awe, e ta haya cu tambe bo lo haya e sintesis di idea di e partidonan cu ta bay forma coalicion cu otro. E ta kere cu awor SVb mester warda esey pa ora cu nan bin.

“Nos t’ey para pa sostene e partidonan den e calculonan necesario pa nan por tin un bista kico ta e efecto di nan diferente plannan cu nan tin”, el a bisa.

Tambe nan ta den preparacion di un nota pa e gobierno cu lo bay sinta riba e proyeccion di e gastonan di e fondonan. Asina nan por tin un idea con SVb ta premira con e fondonan aki ta bay desaroya den termino cortico y largo. Unabes cu e proyeccion aki ta cla, e gobierno nobo lo por tin un bista riba unda e retonan ta.

Segun Sr. Jacobs den nos sistema di siguridad social actualmente nan por proyecta e gastonan cu e fondonan lo por confronta, pero loke ta resulta dificil di proyecta ta bo prestacion economico. Nan a observa esaki durante e ultimo añanan unda nan a yega di premira cierto desaroyo economico, pero na final di dia no a resulta. Esaki tin su consecuencia riba entrada di e fondonan a basenan di e primanan.

Tin biaha nan ta premira un suma a base di e primanan y ta resulta cu e ta menos; te hasta 10 miyon menos di loke inicialmente a wordo premira. Tambe na inicio di 2018, SVb hunto cu departamento di Impuesto ta bay inicia un proyecto pa busca y cuminsa cobra e prima di AOV cu tin riba caya. Nan ta calcula cu ta alrededor di 4 pa 13 miyon florin nan no ta cobrando pa aña.

E ta haya cu esaki ta un fenomeno mundial y no di Aruba so, pero e ta haya cu den cierto momento nos tin cu cuminsa pensa con nos ta bay fortifica y duna atencion pa economia ta reactiva y duna su frutanan. El a bisa cu loke ta e seguro di malesa y accidente, SVb ta mirando un bon desaroyo den esey.