Director di Academia Internacional di Bombero (AIB), Carlos Ramos a realisa un bishita na Aruba pa evalua entre otro si nos isla lo por bira e pais anfitrion pa e proximo reunion di Organisacion di Bomberonan di Caribe (Caribbean Fire & Associates).
E ta un organisacion integra pa e hefenan y assistentnan di bombero di Caribe y actualmente e ta su presidente na nivel internacional. El a yega di organisa tres biaha e reunion general di CFA na Rep. Dominicana cu e presencia di mas cu 28 pais di nos region. E ta bay sostene un reunion cu e hefe di e cuerpo di bombero di St. Thomas pa organisa nan proximo evento di Caribbean Fire & Associates na Aruba. Tambe e no ta descarta cu den un futuro no mucho leu nan lo por organisa e conferencia di NFPA (Nacional Fire Protection Association) aki tambe. E ta un conferencia di siguridad mundial unda ta asisti alrededor di 3 mil persona. Logicamente esaki ta demanda un bon preparacion logistico.
“Si mi por logra cu CFA lo por bin Aruba den nan proximo asamblea of reunion, sigur e lo bira un exito pa e isla aki y tur su habitante”, el a bisa. Tambe e tin bon contacto cu e miembronan di e directiva di Asociacion di Bomberonan Hispano di Merca, caminda e lo sondea e posibilidad pa wak si nan lo ta interesa di realisa un evento na Aruba.
Relacion bombero y universidad
Sr. Ramos ta abogado y arkitecto di profesion, pero e tin un trayecto largo den e cuerpo di bombero di San Pedro de Macoris (Republica Dominicana). E tin experiencia trahando cu bomberonan a base di su estudio na Merca.
E tin e funcion di general di brigada di e cuerpo uniforma aki, pero actualmente e ta trahando como presidente, director y fundado di AIB cu ta ofrece training na nivel nacional, no solamente na e bomberonan Dominicano y polis, sino tambe den scolnan y empresanan priva. E academia aki tin 9 aña di existencia caba. Nan a biaha den diferente pais rol mundo pa duna training riba e trabou cu un bombero mester realisa.
E ta haya cu Aruba ta un pais ideal pa realisa e tipo di evento aki, ya cu e ta un isla bunita, hospitalario y safe, locual ta haci honor na su slogan “One Happy Island”.
E ta haya cu mirando e situacion aki e por crea diferente laso no solamente riba tereno di bombero sino universitario y te hasta comercial. Pa varios aña e tabata decano di e facultad di Ingenieria y Arkitectura di Universidad Central Del Este, tambe na Universidad Autonoma di Santo Domingo (UASD) y otro universidad. Pesey durante su estadia na Aruba nan a bishita e Rector di Universidad di Aruba, Glen Thode pa intercambia informacion.
Sr. Ramos ta considera e posibilidad di crea un intercambio pa asina tanto studiantenan di Aruba por bay Rep Dominicana y vice versa pa nan por completa parti di nan estudio. E ta haya cu si nan por crea un programa comun manera Universidad di Aruba tin cu Hulanda lo ta hopi bon. “Na Santo Domingo nos tin un bon desaroyo na nivel profesional y academico”, el a bisa.
El a expresa su gradicimento na e cuerpo di bombero di Aruba cu a brinda nan un caluroso bonbini. “Nos ta spera di por debolbe un dia loke nan a haci pa nos”, el a expresa na Bon Dia Aruba.
