Merca lo retira e mayor parti di personal di su embahada na La Habana, despues di e misterioso atakenan di zonido cu a causa varios problema di salud na como binti diplomatico, un fuente di gobierno Mericano a confirma na El Nuevo Herald.
Gobierno Mericano a ordena pa retira mas di mita di su personal di e sede diplomatico na La Habana. Adicionalmente, lo emiti un alerta recomendando ciudadano Mericano pa no biaha pa e isla, debi na e atakenan. E emision di visa na La Habana tambe a keda suspendi pa tempo indefini. Tambe, Merca lo no manda delegacion oficial pa Cuba aunke lo mantene relacion diplomatico y ta di acuerdo pa sostene reunion cu representante di gobierno Cubano na Washington.
“Mientras cu gobierno di Cuba no ta ofrece garantia encuanto e siguridad di e personal diplomatico, e personal den e embahada lo continua reduci na e asuntonan esencial so pa por ofrece servicio basico na e ciudadano Mericano y mantene operacion di e embahada”, un funcionario di nivel halto di Departamento di Estado a declara.
E funcionario a reconoce e cooperacion di gobierno Cubano pero a bisa cu no por descarta cu e atakenan ta continua. Tampoco el a descarta e envolvimento di un tercer pais den e atakenan.
Departamento di Estado a anuncia suspension di emision di visa na Cuba, sin finalisa e detayenan di con lo maneha e situacion nobo. Otro funcionario a limita na bisa cu kisas e Cubanonan por solicita visa den tercer pais, sin splica con e procedemento lo ta.
Un vocero di Departamento di Estado a aclara cu e programa di re unificacion familiar tambe lo keda afecta, ya cu lo suspende expedicion di visa di inmigrante y no inmigrante.
Mientras tanto, presidente Trump a anuncia un cambio di politica encuanto Cuba y a lansa un mensahe duro contra e regimen na e isla. Cu su retorica mas duro contra Cuba te na e momento aki, presidente Donald Trump a bisa cu ta anuncia ‘cancelacion total di e acuerdo malo cu e regimen Cubano’, dilanti di un audiencia entusiasma di ciudadano Mericano di descendencia Cubano den e teatro Manuel Artime na Miami.
