Awe gobernador Alfonso Boekhoudt lo ricibi e lidernan di e partidonan ganado entre otro pa cuminsa e formacion di un gabinete nobo. Mike Eman lo presenta 1or merdia.

Sr. Eman a haci un yamada ayera na su sostenedonan pa warda nan T-shirt y bandera y bin compañe na gabinete di gobernador. Ayera tabatin comentario entre otro den medionan social como cu despues diasabra madruga e impresion tabata cu sr. Eman a retira inmediatamente . Sinembargo na e momento ey ya el a indica cu e ta keda lider di e partido te ora nan a dicidi kico lo pasa y ken lo bay bira e lider nobo di AVP. E nomber di Richard Arends a cay frecuentemente sinembargo no tin niun confirmacion y sr. Arends mes no ta contestando. Number 2 riba lista di AVP Benny Sevinger ya a indica den un entrevista cu Bon Dia Aruba na cas di partido diasabra madruga (despues di e anuncio di retiro di sr. Eman) cu e lo no asumi e posicion di lider nobo.

Desde sr. Eman su declaracion, por scucha comentario decepciona henter e weekend den seno di AVP, sigur di esunnan cu a vota riba sr. Eman. E lider di AVP atrobe a logra di bira e votegetter di eleccion. Aunke el a bay atras compara cu 2013, ainda sr. Eman a ricibi 7822 voto (5% menos cu na 2013: 8222 voto).

E di dos riba e lista di candidatonan cu mas voto ta lider di MEP, Evelyn Wever Croes cu 3503 (3% mas cu na 2013: 3396 voto)

Di tres riba e lista aki ta lider di RED Ricardo Croes cu a logra 3359 voto. Na 2013 e tabata number 2 riba e lista y a ricibi 420 voto. Pues sr. Croes ta e gran ganado relativamente (699,7%).

Lider di POR Otmar Oduber a logra di haya 1808. Na 2013 e tabata number 4 riba lista di AVP y a ricibi 4008 voto. Andin Bikker number 2 awor riba lista di POR tabata na 2013 e lider di PDR. Na eleccion ey el a ricibi 3047 voto. Marisol Lopez Tromp number 3 riba lista di POR, tabata number 29 riba lista di AVP na 2013, logrando e eleccion ey 1643 voto. E eleccion awor el a haya 497 voto.

Benny Nisbet lider di PPA pero number 3 riba e lista combina di PPA/UPP a ricibi 150 voto. Na 2013 el a haya 245 y PPA a haya total 506 voto. E lista combina awor a logra 656 voto total. UPP na 2013 a ricibi un total di 805 voto. Lider Booshi Wever a ricibi na 2013 652 voto y awor como number 1 riba e lista combina 222 voto.

Como partido nobo Raiz cu solamente 5 candidato a logra di haya 2107 voto total. Lider Ursell Arends a ricibi 1433 voto. Sigui pa Tai Foo Lee cu 308 voto.

Finalmente lider di Curpa Cristina Lampe a ricibi 158 voto y lider di MAS Holmo Henriquez a haya 127 voto.

Manera por mira riba e potret riba frontpage gobernador Boekhoudt a ricibi e resultadonan di eleccion provisorio diasabra pasa.